Geta eyrnatappar valdið skaða á heyrn?

Nafn þitt

Netfang þitt

Netfang móttakanda

Ruslpóstvörn =

Svar

Geta eyrnatappar valdið skaða á heyrn?
Eyrnatappar eiga ekki að hafa skaðleg áhrif á heyrn séu þeir rétt notaðir.

Eyrað skiptist í ytra eyra, miðeyra og innra eyra. Til ytra eyrans teljast eyrnablaðkan (e. pinna) og eyrnasnepillinn, sem í daglegu tali er átt við þegar að talað er um eyra, auk hlustarinnar eða eyrnaganga (e. ear canal) sem enda við hljóðhimnuna (e. tymphanic membrane), en innan hennar er miðeyrað. Hlustin er um 2,5 cm löng og 0,8 cm í þvermál, hún stefnir fram og niður og skiptist í brjóskhluta og beinhluta. Hjá börnum er nánast öll hlustin klædd brjóski en hjá fullorðnum eru innri 2/3 hlutar hennar aðeins húðklætt bein. Í brjóskhlutanum, sem er ytri hluti hlustar, er þykk húð klædd hári og brjósklag undir. Húðin yfir beinhlutanum er aftur á móti þunn og hárlaus og er þétttengd beinhimnu undirliggjandi beins. Innri hlutinn (beinhlutinn) er því mun viðkvæmari en ytri hlutinn og erting þar getur valdið bæði sársauka og blæðingu. Af þessum sökum er ekki gott að setja neitt inn í eyrað lengra en eyrnahárin ná, en þar sem þeim sleppir tekur viðkvæmi beinhlutinn við.

Venjulegir eyrnatappar eru um 1,5-2 cm að lengd og því er ekki æskilegt að troða þeim alveg inn í eyrað, heldur tilla þeim fremur í hlustina. Hættan við mikla notkun eyrnatappa, sérstaklega ef þeir eru settir of innarlega, er að þeir ýti eyrnamerg inn í hlustina þar sem hann safnast fyrir og getur með tímanum valdið heyrnardeyfu. Í þessum tilfellum skal leita til heimilislæknis eða háls-, nef- og eyrnalæknis sem getur þá hreinsað merginn úr hlustinni með sogi eða töng.

Einnig skal varast mikla notkun eyrnapinna því fólk hefur tilhneigingu til að stinga þeim of langt inn í eyrað og valda þannig sársauka og blæðingu, og í verstu tilfellum getur hljóðhimnan skaddast.

Mynd:

• Ear Plugs | Hearing Loss Awareness - IdaInstitute. (Sótt 24. 9. 2013).

...