Af hverju fáum við starabit?

Nafn þitt

Netfang þitt

Netfang móttakanda

Ruslpóstvörn =

Svar

Af hverju fáum við starabit?
Í daglegu tali er stundum talað um starabit. Hér er þó ekki um bit frá staranum (Sturnus vulgaris) sjálfum að ræða heldur flóm sem fylgja honum. Íslendingar hafa iðulega kallað þessa fló starafló en réttast er að kalla hana hænsnafló, samanber latneska heiti hennar Ceratophyllus gallinae enda er fræðiheitið kennt við hænsn (Gallus). Fló þessi hefur einnig dálæti á öðrum hópum fugla svo sem dúfum (Columbidae) og spörfuglum (Passeriformes) en stari telst til spörfugla.

Eins og flestir vita sækir starinn í að verpa í híbýlum hér á landi, þó eitthvað beri á að hann verpi í klettum líkt og hann gerði upphaflega.

Í þessu hreiðri sem gert var á útigrilli má eflaust finna einhverjar flær. Réttast væri að kalla starafló hænsnafló á íslensku, enda er latneska heiti hennar kennt við hænsn.

Venjulega er fyrsta árið sem starinn gerir sér hreiður í híbýlum nokkuð friðvænlegt. Flóin fylgir með og þar leggur hún grunn að næstu kynslóð flóa. Vorið eftir vitjar starinn óðalsins og leggur grunn að varpi. Snyrtir og snurfusar hreiðrið og flærnar skríða úr púpunum og bíða eftir blóðskammtinum. Ef starinn vitjar að einhverjum sökum ekki hreiðursins eða lokað hefur verið fyrir hreiðurholuna getur skapast ónæði. Hungurvofan bankar á dyr hjá flónum og þær leggja á flakk enda er ekki von á neinum matarskammti í hreiðrið. Sumar berast inn á heimili en aðrar leita út úr holunni og halda til í garðinum eða í næsta nágrenni. Þar stökkva þær á allt sem leið á fram hjá, bæði menn og skepnur og taka sér far með viðkomandi. Þannig berast þær einnig inn í hús.

Gæludýr, svo sem hundar og kettir, eiga það til að bera flær inn á heimili. Þar leggjast flærnar á heimilisfólk, bíta það og sjúga úr því blóð. Þessu geta fylgt mikil óþægindi

Mynd:

• en.wikipedia.org - European Starling. Sótt 13.7.2011.

...