Hvað urðu risaeðlur oftast gamlar?

Nafn þitt

Netfang þitt

Netfang móttakanda

Ruslpóstvörn =

Svar

Hvað urðu risaeðlur oftast gamlar?
Steingerðar leifar risaeðlu geta sagt okkur ýmislegt um lífshætti viðkomandi dýrs eða tegundar; hvernig það hreyfði sig, hvað það át og ýmsa aðra þætti í vistfræðilegri stöðu þess. En það getur, eftir því sem við best vitum, ekki sagt okkur hversu gamalt dýrið var þegar það datt niður dautt.

Menn vita því ekki fyrir víst hversu gamlar risaeðlur urðu. Líklega urðu þær þó nokkuð gamlar. Þessa ályktun má draga af því að mörg af elstu hryggdýrum heimsins í dag eru stórvaxin skriðdýr, rétt eins og risaeðlurnar. Sem dæmi má nefna að langlífustu hryggdýr sem nú eru uppi, risaskjaldbökur, geta orðið meira en 150 ára gamlar og krókódílar, stærstu núlifandi skriðdýrin, geta orðið rúmlega sjötugir. Þá geta stórvaxnir fuglar, eins og svanir, orðið rúmlega 80 ára gamlir, en fuglar eru taldir komnir af risaeðlum.

Spendýr virðast að jafnaði ekki verða jafn langlíf því aðeins örfáar spendýrategundir ná viðlíka aldri og skriðdýrin. Þar má að sjálfsögðu nefna manninn og líka fíla sem verða allt að 70 ára gamlir. Af langlífum spendýrum má einnig nefna norðhval (Balaena mysticetus). Hann er rólyndisleg og stórvaxin skepna sem lifir í köldum heimskautasjónum fyrir norðan Ísland og á fleiri hafsvæðum norðurhjarans. Það kann að vera að rólegt fas og kalt umhverfi valdi því að dýr af þessari tegund geta náð óvenju háum aldri, en samkvæmt óstaðfestum heimildum getur þessi hvalur ef til vill orðið allt að 200 ára,

Langlífustu fiskar og froskdýr ná vart hærri aldri en 50 árum.

Mynd:

• Dr. Bob Bakker with Dino - Dinosaur - Wikipedia, the free encyclopedia. (Sótt 5. 8. 2014)

...