Eru bessadýr á Íslandi?

Nafn þitt

Netfang þitt

Netfang móttakanda

Ruslpóstvörn =

Svar

Eru bessadýr á Íslandi?
Í heild hljóðaði spurningin svona:

Eru bessadýr á Íslandi? Hvað þola bessadýr mikið frost og hita?

Tardigrade eða bessadýr, eins og þessi lítt þekkti hópur dýra heitir á íslensku, tilheyra fylkingu hryggleysingja. Bessadýr eru flokkur sérkennilegra og óvenjuharðgerðra smádýra sem flokkunarfræðingar hafa ekki getað tengt á augljósan hátt við aðra dýraflokka sem nú eru uppi.

Bessadýrin eru ógreinilega liðskipt og hafa oftast fjögur útlimapör. Útlimirnir hafa klær og líkjast fótum. Bessadýr eru þekkt fyrir einstaka aðlögunarhæfni og fjölmargar tegundir þeirra takast á við miklar öfgar í hita- og rakastigi á Jörðinni. Með því að leggjast í dvala geta þau þolað suðu, næstum alkul, mikinn þrýsting og sterka geimgeislun. Nánar er fjallað um bessadýr í svörum við spurningunum Hvers konar dýr eru þau sem nefnast tardigrade? og Hvers konar dýr eru vatnabirnir og hafa þeir verið notaðir í vísindalegum tilgangi og sendir í geimferðir?

Alls hafa um 20 tegundir bessadýra fundist hér á landi. Þau finnast einkum í mosa eða grassverði. Þau fara sjaldnast nema stutt ofan í jarðveginn og eru algengust í snjódældum. Bessadýr finnast einnig í fersku vatni. Blávatn nefnist nýtt vatn sem myndaðist í fornum eldgíg á toppi Oks í Borgarfirði þegar jökull hörfaði þaðan fyrir fáeinum árum. Þar hafa bessadýr fundist.

Sennilega eru bessadýr meðal þeirra dýra sem fyrst nema land þegar nýtt land verður til víða á Jörðinni. Bessadýr eru því einhvers konar sporgöngutegund í landnámi lífríkisins.

Mynd:

• SEM image of Milnesium tardigradum in active state - journal.pone.0045682.g001-2.png - Wikimedia Commons. Höfundar: Schokraie E, Warnken U, Hotz-Wagenblatt A, Grohme MA, Hengherr S, o.fl. (2012). Birt undir Creative Commons Attribution 2.5 Generic leyfi. (Sótt 2. 11. 2015).

...