Hvað er eitt ljósár mörg ár?

Nafn þitt

Netfang þitt

Netfang móttakanda

Ruslpóstvörn =

Svar

Hvað er eitt ljósár mörg ár?
Ljósár er sú vegalengd sem ljós ferðast á einu ári og vísar því til vegalengdar. Eitt ár er hins vegar sá tími sem það tekur Jörðina að ganga einn hring í kringum sólina.

Hér er því um tvær mismunandi mælieiningar að ræða sem ekki er hægt að bera saman. Önnur mælir vegalengd en hin tíma. Til dæmis vitum við að það eru $100$ sentimetrar í $1$ metra þar sem bæði sentimetri og metri mæla lengd. Auk þess vitum við $1$ kílógramm eru $1000$ grömm þar sem bæði kílógramm og gramm mæla þyngd. Aftur á móti er ekki unnt að segja að það séu ákveðið mörg ár í einu ljósiári.

Algengast er að nota ljósár þegar rætt er um fjarlægðir til stjarna. Til dæmis er næsta stjarna utan sólkerfisins í rúmlega $4$ ljósára fjarlægð frá Jörðinni eins og lesa má betur um á Stjörnufræðivefnum.

Ljósið ferðast $299.792.458$ metra á sekúndu eða nærri $300.000$ kílómetra á sekúndu. Til samanburðar er brautarhraði Jarðar um sólu um $30$ kílómetrar á sekúndu. Á einu ári ferðast ljósið svo nákvæmlega $9.460.730.472.580.800$ metra sem einnig má rita sem $9,4607\cdot 10^{15}$ metra.

Mjög erfitt er að ímynda sér þá vegalengd sem ljósið ferðast á einu ári en til dæmis er sólarljósið einungis rúmlega 8 mínútur á leiðinni til Jarðar!

Heimildir:

• Light-year - Wikipedia. (Skoðað 27.04.2017).
• How Long is a Light-Year? - NASA. (Skoðað 27.04.2017).
• Næsti nágranni sólar | Mynd vikunnar | Stjörnufræðivefurinn. (Skoðað 27.04.2017).
• Þorsteinn Vilhjálmsson. „Hvers vegna er ekki hægt að ferðast á ljóshraða, til dæmis að búa til vél sem getur það?“ Vísindavefurinn, 12. maí 2000. (Skoðað 27.04.2017).
• ÖJ. „Hversu langt er eitt ljósár? Hversu hratt þyrfti maður að ferðast til að ná þangað á einu ári?“ Vísindavefurinn, 24. nóvember 2000. (Skoðað 27.04.2017).
• Earth - Wikipedia. (Skoðað 27.04.2017).

Mynd:

• Sunset - Wikipedia. (Sótt 12.05.2017).

...