Hvað eru kúlulán?

Nafn þitt

Netfang þitt

Netfang móttakanda

Ruslpóstvörn =

Svar

Hvað eru kúlulán?
Kúlulán (e. bullet loan eða balloon loan) eru ein tegund lána. Þau hafa þá sérstöðu að ekki eru greiddar afborganir af láninu fyrr en í lok lánstímans. Stundum eru vextir greiddir reglulega á lánstímanum en einnig þekkjast kúlulán þar sem vöxtunum er bætt við höfuðstólinn og allt greitt í einu í lok lánstímans. Hugtakið er almennt notað um lán sem eru til nokkuð langs tíma, til dæmis nokkurra ára, en mörg styttri lán eru í raun kúlulán, þótt heitið sé yfirleitt ekki notað um þau. Þannig eru lán sem tekin eru með útgáfu víxils kúlulán í eðli sínu.

Þess má geta að reynslan sýnir að kúlulán geta verið nokkuð hættuleg tegund lánveitinga vegna þess að ekki reynir á getu lántakans til að greiða af láninu fyrr en undir lok lánstímans. Það getur ýtt undir vanskil og gert þau alvarlegri.

Í aðdraganda hruns fjármálakerfisins íslenska árið 2008 var nokkuð um að kúlulán væru veitt til ýmissa áhættusamra fjárfestinga, til dæmis kaupa á hlutafé. Þá treystu bæði lánveitandi og lántaki því í raun að eignin sem keypt var myndi hækka í verði á lánstímanum þannig að í lok hans stæði verð hennar undir bæði höfuðstól lánsins og vöxtum. Það reyndist í mörgum tilfellum rangt og því tapaðist mikið af því fé sem hafði verið lánað með þessum hætti. Þetta á þó ekki við um öll kúlulán og í sumum tilfellum geta þau verið algjörlega eðlileg tegund lána.

Mynd:

• Free Stock Photo of Gun, Bullets, and Cash - Public Domain photo - CC0 Images. (Sótt 6.03.2018).

...