Spurning

Hvernig er styrkleikalisti FIFA reiknaður út?

Spyrjandi

Eggert Jónsson, f. 1984

Svar

Við ákvörðun stiga á styrkleikalista FIFA er tekið tillit til fleiri þátta en aðeins hvort lið sigrar, tapar eða um jafntefli er að ræða. Þeir þættir sem eru metnir inni í stigagjöfina eru eftirfarandi:

Stig fyrir sigur, jafntefli eða tap.
Að viðbættum stigum fyrir mörk skoruð í leik.
Að frádregnum stigum fyrir mörk sem liðið fær á sig.
Að viðbættum aukastigum fyrir gestaliðið.
Margfaldað með ákveðnum stuðli sem lýsir mikilvægi leiksins.
Margfaldað með svonefndum heimsálfustuðli.

1) Lið sem eru neðarlega á styrkleikalistanum geta fengið stig fyrir góðan leik gegn sterkum þjóðum þrátt fyrir að þau tapi. Ef leikir vinnast í vítaspyrnukeppni fær tapliðið stig eins og um jafntefli væri að ræða.

2-3) Til að hvetja til sóknarbolta fást fleiri stig fyrir mörk sem lið skorar en mínusstig fyrir mörk sem lið fær á sig.

4) Gestalið fær alltaf 3 stig.

5) Vináttulandsleikir eru margfaldaðir með 1, leikir í undankeppni heimsmeistarakeppninar eru margfaldaðir með 1,5 og í heimsmeistarakeppni er margfaldað með 2.

6) Stig fyrir leiki við lið í Evrópu og Suður-Ameríku eru margfölduð með 1. Við Asíulið er margfaldað með 0,9, leikir við lið í Mið- og Norður-Ameríku eru margfaldaðir með 0,86 og leikir við lið í Afríku og Eyjaálfu eru margfaldaðir með 0,84.

Fyrir sigurleik fást á bilinu 10-30 stig, eftir því hver andstæðingurinn er. Til að komast í efsta sæti heimslistans ætti þess vegna að vera nóg fyrir Íslendinga, sem nú eru í 53. sæti heimslistans með 544 stig, að sigra 11 sterkustu þjóðir heims á heimsmeistaramóti. Þannig ættum við að ná tæpum 330 stigum og komast upp fyrir heimsmeistara Brasilíu sem eru með 852 stig. Önnur leið er að koma á afar löngu vináttumóti með landsliðum Montserrat og Bútan, sem eru með neðstu liðum á heimslistanum, en þau lið þyrftum við að vinna rúmlega 30 sinnum til að nálgast Brasilíumenn.

Skoðið einnig svar við spurningunni