Hvað er mikill sykur í kóki?

Nafn þitt

Netfang þitt

Netfang móttakanda

Ruslpóstvörn =

Svar

Hvað er mikill sykur í kóki?
Samkvæmt upplýsingum um næringargildi sem eru á kókflöskum og dósum eru 10,6 grömm af kolvetnum (sykri) í hverjum 100 millilítrum af gosdrykknum. Það þýðir að í hálfum lítra, sem er vinsæll skammtur af kóki, eru um 53 grömm af sykri. Í tveggja lítra flösku er sykurmagnið um 212 grömm.

Til þess að átta sig betur á magninu er ágætt að hugsa sykurinn í sykurmolum. Reyndar eru sykurmolar misstórir en það má til dæmis miða við að molinn séu 2 grömm eins og Lýðheilsustöð gerir í ágætri samantekt um viðbættan sykur í matvælum. Samkvæmt því eru rúmlega 26 sykurmolar í hálfum lítra af kóki og 106 sykurmolar í tveggja lítra flösku.

Í 100 ml af kóki eru 10,6 g af kolvetnum. Í tveggja lítra flösku eru því alls 212 g sem jafngildir 106 sykurmolum eða 53 teskeiðum af sykri.

Sumum kann að finnast betra að sjá magnið fyrir sér í teskeiðum. Samkvæmt upplýsingum á vefsíðunni Cooking measurement converter er ein teskeið af sykri um það bil fjögur grömm. Í hálfslítra kókflösku eða dós eru því rúmlega 13 teskeiðar af sykri og um 53 teskeiðar í tveimur lítrum af kóki.

Sá sem drekkur hálfan lítra af kóki á dag hvern einasta dag vikunnar allan ársins hring fær með gosdrykkjunni einni saman rúmlega eitt og hálft kíló af sykri á mánuði eða rúmlega 19 kíló á ári.

Á Vísindavefnum eru fleiri svör um gosdrykki, til dæmis:

• Er betra fyrir tannheilsuna að neyta sykurskertra gosdrykkja í stað sykraða, þá í sambandi við tannátu? eftir Þorbjörgu Jensdóttur og Peter Holbrook
• Er það rétt að diet-gos bindi vökva í líkamanum og því sé ekkert betra að drekka það en venjulegt gos? eftir Björn Sigurð Gunnarsson
• Er appelsínusafi óhollari en gos? eftir Ólöfu Guðnýju Geirsdóttur

Mynd: EDS

---

Hér er einnig svarað spurningunni:

Hvað eru margir sykurmolar í 2 l kókflösku?

...