Leiðir vatn rafmagn vel?

Svar

Rafleiðni vatns fer að mestu eftir styrk jóna í vatninu. Í saltvatni eru til dæmis Na⁺ og Cl^- jónir sem leiða rafmagn. Sjór hefur rafleiðni í kringum 5 S/m (siemens á metra er eining fyrir rafleiðni eins og lesa má um í svari við spurningunni Hvaða málmur leiðir best?) en fyrir hreint kranavatn getur leiðnin verið 1000 sinnum lægri. Þetta telst ekki sérstaklega mikil rafleiðni; silfur leiðir til dæmis rafmagn um 10 milljón sinnum betur en sjór.

Mæling á rafleiðni í vatni er góð leið til að mæla hreinleika vatnsins, hreinsað (afjónað) vatn í tilraunastofu getur haft rafleiðni 0,000005 S/m. Mörg föst efni leiða þó rafmagn enn síður, þannig að ef rafleiðni allra efna er borin saman þá má segja að vatn leiði hvorki sérstaklega vel né sérstaklega illa.

Í eftirfarandi myndbandi er sýnt hvernig rafleiðni vatns breytist þegar salti (NaCl) er bætt út í afjónað vatn. Í vatninu leysist saltið upp í Na⁺ og Cl^- jónir. Þegar jónirnar eru komnar í vatnið eykst rafleiðnin og það kviknar á perunni þrátt fyrir að koparplöturnar snertist ekki.

Myndband sem sýnir hvernig rafleiðni vatns eykst þegar salti er bætt út í afjónað vatn.