Hvaða höf liggja að Ítalíu?

Svar

Ítalía liggur að mestu leyti á Appennínaskaga, stórum og löngum skaga sem skagar langt út í Miðjarðarhafið og líkist, eins og frægt er, háhæluðu stígvéli. Ríkið nær líka yfir fjölmargar eyjar, tvær langstærstu eyjarnar eru Sikiley og Sardinía, sem eru jafnframt stærstu eyjarnar í Miðjarðarhafi. Skaginn og eyjarnar afmarka hafsvæði; Adríahaf austan við skagann, Jónahaf í suðaustri, Tyrrenahaf í vestri og Lígúríuhaf í norðvestri. Öll þessi höf eru hafsvæði í Miðjarðarhafinu.

Smellið á myndina til að sjá stærri útgáfu.

Adríahaf liggur milli Appennínaskaga og Balkanskaga og er nyrsti hluti Miðjarðarhafsins. Adríahaf teygir sig um 800 km frá norðvestri til suðausturs og þekur 132 ferkílómetra svæði. Sunnan við Adríahaf liggur Jónahaf en það afmarkast af Grikklandi og Albaníu í austri og Appennínaskaga og Sikiley í vestri. Jónahaf tengist Adríahafi um Otrantósund. Tyrrenahaf liggur milli vesturstrandar Ítalíu og eyjanna Korsíku, Sardiníu og Sikileyjar. Það tengist Jónahafi um Messínasund. Lígúríuhaf liggur norðvestan við Tyrrenahaf og afmarkast af Korsíku í suðri og strandlengju Ítalíu í norðri.

Heimildir:

• Ítalía - Wikipedia, frjálsa alfræðiritið. (Skoðað 20.6.2012).
• Adriatic Sea - Wikipedia, the free encyclopedia. (Skoðað 20.6.2012).
• Tyrrhenian - Wikipedia, the free encyclopedia. (Skoðað 20.6.2012).
• Ionian Sea - Wikipedia, the free encyclopedia. (Skoðað 20.6.2012).
• Ligurian Sea - Wikipedia, the free encyclopedi. (Skoðað 20.6.2012).

Mynd:

• Tyrrhenian Sea - Wikipedia, the free encyclopedia. Myndatexti íslenskaður af ritstjórn. (Sótt 20.6.2012).

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.