Hvenær var þverflautan fundin upp?

Svar

Hindúaguðinn Krishna er gjarnan sýndur með þverflautu.

Þverflauta er tréblásturshljóðfæri með blástursopið á hliðinni, sem haldið er láréttri þegar leikið er á hana. Fyrsta þverflautan sem fundist hafa heimildir um er kínversk chi-flauta, sem talið er að menn hafi leikið á snemma á 9. öld f.Kr., fyrir næstum því 3000 árum.

Fyrstu heimildir um þverflautur í Evrópu eru höggmyndir frá annarri og þriðju öld f.Kr., sem gerðar voru af Etrúrum en þeir voru þjóð sem bjuggu á Ítalíu fyrir tíma Rómaveldis. Seinna virðast þverflautur þó hafa glatast úr evrópskri menningu þangað til á 11. eða 12. öld en þá bárust þær til Evrópu frá Asíu í gegnum Austrómverska keisaradæmið (Býsans). Konsertþverflautur nútímans þróuðust út frá þessum flautum.

Vestræn konsertþverflauta.

Þýski tónlistar- og uppfinningamaðurinn Theobald Boehm hannaði þverflautuna eins og hún þekkist í dag, og fékk einkaleyfi á uppfinningu sinni árið 1847. Í hönnun hans voru tvær mikilvægar nýjungar. Annars vegar var það takkakerfið, sem var mun flóknara en þau sem áður höfðu sést og krafðist nýrra fingursetninga. Hins vegar var það efniviðurinn en flauta hans var gerð úr málmi, ólíkt eldri flautum sem voru oftast úr viði. Þverflautur sem notaðar eru nú til dags eru að mestu eins og uppfinning hans en smávægilegar breytingar hafa verið gerðar á takkakerfinu.

Heimildir:

• en.wikipedia.org - Flute.
• en.wikipedia.org - Western concert flute.
• Transverse flute. Af síðu háskólans í Michigan.
• The transverse flute. Af síðu tónlistardeildar háskólans í Iowa.

Myndir:

• Mynd af Krishna er af wikipedia.org. Sótt 21.6.2012.
• Mynd af flautu er af wikipedia.org. Sôtt 21.6.2012.

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.