Hvenær voru vélbyssur notaðar fyrst í stríði?

Svar

Í vefútgáfu Íslensku alfræðiorðabókarinnar segir að vélbyssa sé „byssa (hlaupvídd 5,45-20 mm) sem hleypir af mörgum skotum í óslitinni röð meðan haldið er í gikkinn; fóðruð með skotfærum frá belti eða magasíni.“

Þessi Maxim-byssa á þrífæti er frá 1895.

Fyrsta alsjálfvirka vélbyssan var hönnuð af Sir Hiram Stevens Maxim (1840-1916) en áður höfðu margar hálfsjálfvirkar byssur komið fram á sjónarsviðið og sumar hverjar sem eru á mörkum þess að vera alsjálfvirkar. Byssa sú sem Maxim fann upp fékk einfaldlega nafn hans, það er Maxim-byssan. Frumgerð hennar kom fram árið 1884.

Innan við áratug síðar hóf breska heimsveldið notkun á byssunni. Talið er að hún hafi fyrst verið notuð í stríði í Ródesíu, sem nú heitir Simbabve, en stríðið heitir á ensku First Matabele War og var háð árin 1893 og 1894.

Heimildir:

• Íslenska alfræðiorðabókin. 1990. Örn og Örlygur, Reykjavík. Vefútgáfa frá 2011.
• en.wikipedia.org - Machine gun.
• en.wikipedia.org - Maxim gun.
• en.wikipedia.org - First Matabele War.

Mynd:

• en.wikipedia.org - Maxim gun. Sótt 19.6.2012.

---

Þetta svar er að hluta til eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.