Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

doktor.is

Er það satt að ísbirnir éti stundum dýr sem eru þrisvar sinnum stærri en þeir sjálfir?

Rannsóknir á fæðuvali ísbjarna (Ursus maritimus) hafa sýnt að selir eru helsta fæða þeirra. Hringanóri (Phoca hispida) skipar þar stærstan sess en á sumum svæðum er kampselur (Erignathus barbatus) næst mikilvægasta fæðan. Aðrar selategundir sem ísbirnir veiða eru vöðuselur (Pagophilus groenlandicus) og blöðruselur (Cystophora cristata) en hlutfall þessara tegunda í fæðunni er afar breytilegt eftir svæðum þar sem útbreiðslusvæði ísbjarnarins nær allt í kringum norðurpól.



Ísbjörn að gæða sér á sel en selir eru helsta fæða þeirra.

Það er staðreynd að ísbirnir geta drepið og étið dýr sem eru allt að þrisvar sinnum þyngri en þeir sjálfir. Dæmi eru um það að nálægt Wrangler-eyju undan ströndum Síberíu hafi fullorðin karldýr ráðist á rostunga (Odobenus rosmarus), slegið hrömmum sínum í bakið á þeim þannig að þeir hryggbrotnuðu og síðan étið þá í rólegheitum.

Enn fremur eru til dæmi um að ísbirnir hafi drepið mjaldur (Delphinapterus leucas) úr öndunaropum lagnaðaríss, en oft bera þessir hvalir stór og mikil ör eftir viðureignir við ísbirni. Mjaldrar geta verið allt að 1,5 tonn að þyngd. Það skal tekið fram að slíkar veiðar fara fram við mjög sérstakar aðstæður og þar eiga einungis fullvaxin karldýr hlut að máli.



Mjaldrar með ör eftir átök við ísbirni.

Mynd:

Útgáfudagur

29.4.2005

Spyrjandi

Magnús Guðmundsson, f. 1987

Höfundur

Jón Már Halldórsson

Jón Már Halldórsson

líffræðingur

Tilvísun

Jón Már Halldórsson. „Er það satt að ísbirnir éti stundum dýr sem eru þrisvar sinnum stærri en þeir sjálfir?“. Vísindavefurinn 29.4.2005. http://visindavefur.is/?id=4970. (Skoðað 22.7.2014).

Sendu inn spurningu
eða

Vísindadagatalið

Sturla Þórðarson

1214-1284

Sagnaritari, skáld og lögmaður. Samdi Íslendinga sögu, sem er hluti Sturlungu, eina gerð Landnámu, tvær konungasögur og orti kvæði og vísur.