Sólin
Rís 05:19 • sest 21:35
Tunglið
Rís 25:18 • Sest 04:56
Flóð
Árdegis: 07:07 • Síðdegis: 19:24
Fjara
Árdegis: 01:08 • Síðdegis: 13:14
Hver stofnaði verslun með íþróttavörur hérlendis og notaði nafnplötu á seldum vörum, til dæmis skíðum, sem á stóð: „LH MÜLLER - Reykjavík“?Þetta var einfaldlega Verslun L.H. Müllers en hann var kaupmaður, norskrar ættar, og hafði verslun sína að Austurstræti 17 í húsi sem var rifið upp úr 1960. Hann verslaði meðal annars með vörur til íþrótta og útivistar og var mikill íþróttafrömuður.
L.H. Müller var norskrar ættar og rak lengi verslun að Austurstræti 17, við austurgafl pósthússins, en það hús var rifið nokkru eftir 1960 og stórhýsi reist í staðinn. Müller var einn helsti brautryðjandi skíðaíþrótta á Íslandi. Hann var til dæmis einn af stofnendum og forystumönnum Skíðafélags Reykjavíkur sem reisti Skíðaskálann í Hveradölum. Þar var haldið fyrsta skipulega skíðamótið í landinu árið 1937. L.H. Müller keypti húsið að Stýrimannastíg 15 árið 1916 og bjó þar lengi. Sonur hans, Leifur Müller, lenti í fangabúðum nasista í síðari heimsstyrjöldinni og ritaði síðar bók um dvöl sína þar. Verslun L.H. Müllers var ein helsta íþróttavöruverslun bæjarins á sinni tíð. Þar fengust bæði skíði og aðrar vörur til íþrótta og útivistar með því sniði sem þá tíðkaðist, og hafa sumar þeirra sjálfsagt verið merktar versluninni með tilhlýðilegum hætti. Þess var oft minnst þegar rigningar urðu miklar og langvinnar eitt sumarið að L.H. Müller auglýsti þá í útvarpi: „Lokað vegna sólskins.“ Heimild:
- Páll Líndal, Reykjavík: Sögustaður við Sund, 1-4. Reykjavík: Örn og Örlygur, 1986-88. Bls. I 52 og III 92.
