Af hverju velja lögfræðingar sér oftar en aðrar starfsstéttir brúna skó í stað svartra við dökk jakkaföt?

Svar

Starfsmenn Vísindavefsins ákváðu að taka sér smá pásu frá pappírskasti (e. paper toss) og öðrum hefðbundnum skrifstofuleikjum, svo sem skrifborðsstólakappakstri (eitthvað verða menn jú að gera þegar ritstjórinn er í útlöndum) til að ræða um þessa spurningu.

Eftir mikið japl, jaml og fuður voru starfsmennirnir alls ekki svo sammála. Sjálfskipuð tískulögga Vísindavefsins vildi nú meina að lögfræðingar þyrftu bara algjört „meikóver“ eins og hann orðaði það. Það væri ekki hægt að lifa með þessu lengur.

Starfsmenn Vísindavefsins í góðra vina hópi. Ef til vill eru starfsmennirnir að kasta steinum úr glerhúsi í þessu föstudagssvari!

Annar starfsmaður vildi þó kafa dýpra og sagði að ef til vill væru lögfræðingar orðnir svo rosalega vanir því að röfla og vera ósammála að þegar einhver segði þeim að skórnir pössuðu ekki við jakkafötin þá færu þeir bara að snúa út úr og beita ýmsum lögfræðilegum bolabrögðum til að fá sínu fram. Það væri því draumórar einir að ætla að breyta þessu. Menn þyrftu bara að læra að lifa með þessu.

Sá þriðji var nú ekkert að kippa sér of mikið upp við þetta. Hann var raunar bara mjög ánægður með fataval lögfræðinga miðað við fataval margra annarra stétta, svo sem eðlisfræðinga. Það væri allt betra en að ganga í jakkafötum úr gömlu gardínuefni móður sinnar!

Mynd:

• Geek Cosplay Group - Wikimedia Commons. (Sótt 4.7.2012).

---

Hafi einhverjir lesendur ekki þegar áttað sig þá er rétt að taka fram að þetta er föstudagssvar. Ef einhver sannleikskorn finnast í því lentu þau þar fyrir misskilning.