Hvort er Mónakó eða Vatíkanið minna ríki?

Svar

Þó Mónakó sé aðeins á stærð við Seltjarnarnesbæ er það samt rúmlega fjórum sinnum stærra en Vatíkanið. Vatíkanið eða Páfagarður er minnsta sjálfstæða ríki heims, aðeins 0,44 km² að flatarmáli.


Útsýni yfir Vatíkanið og Róm frá Péturskirkjunni.
Eins og sjá má í töflunni hér fyrir neðan eru fimm af tíu minnstu ríkjum heims í Evrópu. Að Möltu undanskilinni eru þessi smáríki Evrópu öll á meginlandinu. Hin ríkin fimm á listanum eru hins vegar öll eyríki, flest í Kyrrahafinu.

Ríki	Svæði	Flatarmál (km2)	Fjöldi íbúa (júlí 2005)
Vatíkanið	Meginland Evrópu	0,44	921
Mónakó	Meginland Evrópu	1,95	32.409
Nárú	Suður-Kyrrahaf	21	13.048
Túvalú	Suður-Kyrrahaf	26	11.636
San Marínó	Meginland Evrópu	61	28.880
Liechtenstein	Meginland Evrópu	160	33.717
Marshall-eyjar	Norður-Kyrrahaf	181	59.071
Sankti Kitts og Nevis	Karíbahaf	261	38.958
Maldíveyjar	Indlandshaf	300	349.106
Malta	Miðjarðarhaf	316	398.534

Flatarmál og fjöldi íbúa í 10 smæstu ríkjum heims.
Vatíkanið er ekki aðeins minnsta ríki heims heldur einnig það fámennasta, í júlí 2005 bjó þar 921 íbúi. Til samanburðar má nefna að íbúar Túvalú í Kyrrahafi, sem er næst fámennasta sjálfstæða ríkið, voru rúmlega 11.600 um mitt ár 2005 og íbúar Nárú, þriðja fámennasta ríkisins, voru rétt um 13.000 á sama tíma. Íbúar í hinu agnarsmáa Mónakó eru hins vegar rúmlega 32.000 og er það eitt þéttbýlasta land í heimi.

Þess má að lokum geta að Vatíkanið er ólíkt öðrum löndum heims bæði hvað kynja- og aldursskiptingu varðar. Helgast það af því að flestir íbúarnir eru þjónar kaþólsku kirkjunnar og eru konur þar í miklum minnihluta. Þær fáu konur sem búa í Vatíkaninu eru flestar, ef ekki allar, nunnur og eðli málsins samkvæmt eru því lítið um börn í Páfagarði.

Á Vísindavefnum er að finna fleiri svör um svipað efni, til dæmis:

• Hver er fámennasta þjóð í heimi?
• Hver eru þrjú stærstu lönd í heiminum í röð?
• Hver eru fimm þéttbýlustu lönd í heimi?
• Hvar er hægt að finna upplýsingar um hversu margir búa í tilteknu landi?
• Hvert er strjálbýlasta land í heimi?

Heimildir og mynd:

• Wikipedia.org:
  • Vatican City
  • List of countries by area
  • List of countries by population
• The World Factbook