Hvað eru fjölmiðlar?

Nafn þitt

Netfang þitt

Netfang móttakanda

Ruslpóstvörn =

Svar

Hvað eru fjölmiðlar?
Sagt hefur verið að það sé álíka erfitt að skilgreina fjölmiðil eins og að skilgreina stól. Flestir telja sig hafa nokkuð góða hugmynd um hvernig stóll lítur út en erfiðara getur reynst að tilgreina nákvæmlega hvaða eiginleika hann þarf að hafa til að geta talist stóll. Það sama gildir um fjölmiðla; flestir vita við hvað er átt, en erfiðara getur verið að koma orðum að því.

Í skýrslu nefndar menntamálaráðherra um íslenska fjölmiðla sem út kom í apríl 2005 er fjölmiðill talinn vera „...stofnun eða fyrirtæki, lögaðili, sem safnar, metur og setur reglulega fram upplýsingar í því skyni að dreifa þeim reglulega til umtalsverðs fjölda fólks á tilteknu svæði “ (bls. 13).

Önnur skilgreining á fjölmiðlum gerir ráð fyrir að fagmenn hanni og noti fjölmiðla til að dreifa efni með það að markmiði að hafa ýmis áhrif á stóran og fjölbreyttan notendahóp.

Almennt er talið að miðill teljist fjölmiðill ef fagfólk stendur að honum, hann sendir eða kemur út reglulega og nær til talsverðs fjölda fólks. Hins vegar er ekki til neitt nákvæmt viðmið um hvað miðillinn þurfi að senda eða koma út oft, eða hversu margir þurfi að nota miðil til þess að hann geti talist fjölmiðill.

Fjölmiðill er miðill sem fagfólk stendur á bak við, sendir eða kemur út reglulega og fær töluverða dreifingu.

Acta diurna populi Romani er eitt elsta þekkta dæmið um fjölmiðil. Acta diurna-fréttablöðin voru gefin út á árunum 130 f.Kr. til 330 e.Kr. samkvæmt tilskipun frá öldungadeildinni í Róm og birt opinberlega. Voru þau ýmist skrifuð í málm eða stein. Í þeim voru sagðar fréttir af ákvörðunum öldungadeildarinnar en einnig fréttir af barnsfæðingum, giftingum og dauðsföllum. Jafnframt veittu þau borgurunum ýmsar almennar upplýsingar. Acta diurna-fréttablöðin voru afrituð og eintök af þeim send til útlanda og til ýmissa borgara.

Nútímafjölmiðlar eru í daglegu tali taldir vera sjónvarp, útvarp, dagblöð og tímarit. Bækur, kvikmyndir, hljómdiskar, DVD-diskar, auglýsingapésar, veggspjöld og annað prentað mál eru vissulega miðlar en flokkast vart undir fjölmiðla. Margir álíta Netið vera fjölmiðil en svo er ekki. Netið er eingöngu tæki til miðlunar.

Frekara lesefni á Vísindavefnum og mynd

• Er hægt að greina bein áhrif fjölmiðla á hegðun fólks? eftir Guðbjörgu Hildi Kolbeins.
• Er merkjanlegur áherslumunur í fréttaflutningi milli fjölmiðla, svo sem dagblaða, útvarps og sjónvarps? eftir Guðbjörgu Hildi Kolbeins.
• Hvað er skjámiðill? eftir Guðbjörgu Hildi Kolbeins.
• Hvenær varð fyrsti íslenski fjölmiðillinn til og hvenær hóf hann starfsemi sína? eftir Gunnar Karlsson.
• Hver er siðferðisgrundvöllur ríkisrekinna fjölmiðla og skylduáskriftar? eftir Þorbjörn Broddason.
• Myndin er af síðunni 21L.015 Introduction to Media Studies, Fall 2003. MIT OpenCourseWare. Efni síðunnar er birt undir leyfinu Creative Commons Licence.

...