Hversu mikil er vindkælingin í miklu frosti og roki?

Svar

Það er staðreynd að tölur sem lesnar eru af hitamæli segja ekki alla söguna um það hversu mikið varmatap er hjá þeim sem eru á ferðinni úti við. Kuldi, sem er hættulítill í hægum vindi, getur orðið lífshættulegur sé jafnframt hvasst.

Á vef Veðurstofu Íslands er að finna töflu sem byggist á kanadískum rannsóknum á vindkælingu. Lesið er af töflunni með því að miða saman lofthitadálk og vindhraðalínu. Taflan er með litakóða sem sýnir hversu mikil áhrif vindkælingin hefur.


Vindkælingatafla með litakóða. Lesið er af töflunni með því að miða saman lofthitadálk og vindhraðalínu. Litirnir gefa til kynna hversu mikil áhrif vindkælingar eru.
Litakóðinn er útskýrður betur hér að neðan:

• Lítil vindkæling: Lítil óþægindi vegna vindkælingar. Góður og þurr hlífðarklæðnaður nægir til að bægja óþægindum frá.
• Nokkur vindkæling: Óþægindi vegna vindkælingar, lítil hætta á kali en þó er hætta á ofkælingu fyrir þá sem eru langtímum saman illa klæddir utandyra. Mikilvægt að klæðast hlýjum fatnaði með vind- og vatnsheldri flík yst. Húfa, vettlingar, trefill og auðvitað góður vatnsheldur skóbúnaður. Forðist hreyfingarleysi utandyra.
• Mikil vindkæling: Veruleg óþægindi vegna vindkælingar. Óvarða húð getur kalið á 10 - 30 mínútum og hætta á ofkælingu fyrir þá sem eru illa klæddir utandyra. Mikilvægt að klæðast hlýjum fatnaði með vind- og vatnsheldri flík yst. Mikilvægt að húð sé ekki óvarin. Húfa, helst lambhúshetta sem hylur andlit, vettlingar, trefill og auðvitað góður, vel einangraður, vatnsheldur skóbúnaður. Forðist hreyfingarleysi utandyra.
• Mjög mikil vindkæling: Óvarða húð getur kalið á 5 - 10 mínútum. Fylgist með doða og hvítum skellum á andliti og útlimum. Ofkæling hlýst af því að vera illa klæddur utandyra. Mikilvægt að klæðast hlýjum fatnaði með vind- og vatnsheldri flík yst. Hyljið bert skinn. Húfa, helst lambhúshetta sem hylur andlit, vettlingar, trefill, og auðvitað góður, vel einangraður, vatnsheldur skóbúnaður. Forðist hreyfingarleysi utandyra.
• Hættuástand: Óvarða húð getur kalið á 2 - 5 mínútum. Mikil hætta á kali. Fylgist með doða og hvítum skellum á andliti og útlimum. Ofkæling hlýst af því að vera illa klæddur utandyra. Mikilvægt að klæðast hlýjum fatnaði með vind- og vatnsheldri flík yst. Hyljið bert skinn. Húfa, helst lambhúshetta sem hylur andlit, vettlingar, trefill og auðvitað góður, vel einangraður, vatnsheldur skóbúnaður. Forðist hreyfingarleysi utandyra. Verið reiðubúin að takmarka allar athafnir utandyra.

Þetta svar er unnið upp úr efni af vef Veðurstofu Íslands og birt með góðfúslegu leyfi.