Hvað búa margir múslimar á Íslandi?

Nafn þitt

Netfang þitt

Netfang móttakanda

Ruslpóstvörn =

Svar

Hvað búa margir múslimar á Íslandi?
Það er ekki hægt að segja nákvæmlega til um það hversu margir múslimar búa á Íslandi þar sem gögn um fjölda þeirra eru af skornum skammti og því einungis um ágiskun að ræða.

Á vef Hagstofu Íslands er hægt að skoða fjölda einstaklinga sem skráðir eru í trúfélög. Á lista Hagstofunnar eru tvö trúfélög múslima, annars vegar Félag múslima á Íslandi, sem viðurkennt var sem trúfélag af dóms- og kirkjumálaráðuneytinu árið 1997, og hins vegar Menningarsetur múslima á Íslandi, sem viðurkennt var sem skráð trúfélag árið 2009. Árið 2011 voru 370 skráðir í Félag múslima og 275 í Menningarsetur múslima. Samtals voru því 645 skráðir í trúfélög múslima á Íslandi.

Þetta segir þó bara hálfa söguna því ekki eru allir múslimar skráðir í skipulögð trúfélög. Í grein eftir Hilmar Magnússon í vefritinu Hugsandi er þessu velt upp og reynt að áætla út frá dönskum niðurstöðum hver hugsanlegur fjöldi múslima á Íslandi gæti verið. Í Danmörku benda rannsóknir til þess að 20-25% múslima séu í skipulögðum trúfélögum. Ef gert er ráð fyrir að hlutfallið sé svipað á Íslandi þá má reikna með að fjöldi múslima sé allt að 3.200 (miðað við að þessir 645 sem eru á skrá samkvæmt Hagstofunni samsvari 20%).

Þessar tölur verður þó að taka með fyrirvara þar sem ekki liggur fyrir hvort hlutfallið hér á landi er það sama og í Danmörku. Á milli áranna 2009 og 2010 fjölgaði skráðum einstaklingum í trúfélögum múslima um 187 sem er töluvert mikið þegar ekki fjölmennari hópur á í hlut. Ástæðan er sjálfsagt fyrst og fremst sú að árið 2009 var stofnað nýtt trúfélag múslima þannig að þau eru nú tvö eins og fram kom í upphafi svarsins. Hugsanlega hefur nýtt félag leitt til þess að hlutfallslega fleiri séu skráðir í skipulögð trúfélög múslima hér á landi en gert er ráð fyrir í dönsku niðurstöðunum.

Það er því kannski réttast að svara spurningunni þannig að fjöldi múslima á Íslandi er alla vega 645 og hugsanlega allt upp í 3.200.

Heimildir:

• Mannfjöldi eftir trúfélögum 1998-2011 á Hagstofa Íslands.
• Hilmar Magnússon. Íslam á Íslandi: Múslímar á Íslandi og viðhorf í þeirra garð á Hugsandi.

Mynd:

• Mosque á Wikipedia.org. Sótt 12.1.2012.

...