Hvernig get ég lært taugavísindi og orðið taugavísindamaður á Íslandi?

Svar

Í háskólum á Íslandi er sem stendur engin sérstök taugavísindadeild. Vilji menn stunda framhaldsnám í greininni verða þeir að gera það utan Íslands. Sem betur fer eru taugavísindi mjög þverfagleg og taugavísindamenn hafa gjarnan bakgrunn í öðrum greinum.

Taugavísindum má gróflega skipta í tvennt eftir aðferðafræði. Í öðrum flokknum eru þær undirgreinar sem fást við eiginleika taugafrumnanna sjálfra, svo sem sameindataugavísindi (e. molecular neuroscience) og frumutaugavísindi (e. cellular neuroscience). Góður undirbúningur fyrir slíkt nám gæti fengist með því að taka áfanga í líffræði, efnafræði, lífefnafræði, og ef til vill lyfjafræði, svo eitthvað sé nefnt.

Hægt er að skipta taugavísindum í tvennt eftir aðferðafræði. Í öðrum flokknum eru undirgreinar sem fást við eiginleika taugafrumnanna en í hinum eru undirgreinar sem rannsaka hvernig taugafrumur vinna saman.

Í hinum flokknum eru undirgreinar sem leggja meiri áherslu á að rannsaka hvernig taugafrumur vinna saman. Í þennan flokk falla til dæmis kerfistaugavísindi (e. systems neuroscience) og hugræn taugavísindi (e. cognitive neuroscience). Hentugur undirbúningur gæti fengist með því að stunda nám í sálfræði, líffræði, eðlisfræði, stærðfræði, tölvunarfræði, verkfræði og mögulega læknisfræði.

Einnig má nefna að hægt er að leggja stund á rannsóknir á taugakerfinu án þess að stunda framhaldsnám í eiginlegum taugavísindum. Sem dæmi er hægt að sérhæfa sig í taugasálfræði (e. neuropsychology), taugalækningum (e. neurology), eða hugfræði (e. cognitive science).

Taugavísindamenn starfa bæði innan og utan íslenskra háskóla. Í háskólum á Íslandi starfa taugavísindamenn til dæmis innan líffræði, sálfræði, verkfræði og læknisfræði. Þeir starfa einnig við ýmsar stofnanir, svo sem spítala, og í einkafyrirtækjum.

Mynd:

• Graduate Studies in Neuroscience — Neuroscience Intranet. (Sótt 22.03.2012).