Hvernig eru egg tjaldsins?

Svar

Tjaldur (Haematopus ostralegus) er af ættbálki strandfugla en hann er vaðfugl með langa fætur. Hann er að mestu leyti farfugl en hluti stofnsins dvelur þó á Íslandi á veturna. Farfuglarnir koma til Íslands í mars eða apríl og fara í ágúst eða september til annarra landa, þá gjarnan Bretlandseyja. Tjaldurinn er svartur á baki, hvítur á maga og með appelsínugulan gogg. Meðallengd tjalds er 43 cm, vænghaf er 80-85 cm og þyngd er 460-620 g. Hann étur krækling og annan skelfisk en hann opnar skeljarnar með kröftugum goggi og étur úr þeim fiskinn. Á landi étur hann ánamaðk og skordýr.

Tjaldur á eggjum.

Egg tjaldsins eru um 5,5 cm á lengd og um 3,9 cm á breidd. Þau eru brún eða gráleit með svörtum rákum og falla gjarnan vel inn í umhverfi sitt. Tjaldurinn verpir einu til fjórum eggjum en oftast eru þau þrjú. Eggin þykja kringlóttari en egg annarra vaðfugla sem eru jafnan nær því að vera perulaga. Varptími tjaldsins hefst í lok apríl eða byrjun maí. Útungunartíminn er 21-27 dagar en kvenfuglinn og karlfuglinn skiptast á að liggja á eggjunum. Talið er að 10.000-20.000 pör verpi á Íslandi á ári. Þau verpa víðs vegar um landið en aðallega við sjó.

Heimildir:

• is.wikipedia.org - Tjaldur
• en.wikipedia.org - Eurasian Oystercatcher
• heimaslod.is
• is.wikipedia.org - Vaðfuglar
• siglfirdingur.is
• djupivogur.is

Mynd:

• Wikipedia. Ljósmyndari er John Haslam. Birt undir Creative Commons-leyfi. Sótt 14. 6. 2012.

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.