Hvert er minnsta líffæri mannslíkamans og hvað gerir það?

Svar

Heilaköngull er oft sagður minnsta líffæri mannsins. Hann er fyrir ofan miðheilann og fyrir framan litla heilann. Heilaköngull kallast svo því hann líkist furuköngli í laginu og er hann aðeins um 8-10 mm að lengd. Hlutverk heilaköngulsins er að mynda og seyta hormóninu melatóníni en það hefur áhrif á svokallaðan líftakt (e. biological rhythm) dýra, það er reglubundnar lífeðlisfræðilegar sveiflur.

Myndin sýnir staðsetningu heilakönguls í mannsheilanum.

Þverskurðarmynd af húð mannsins.

Eitlar eru líka stundum nefndir sem minnstu líffæri mannslíkamans en þeir eru aðeins frá örfáum millimetrum að um tveimur sentímetrum að stærð. Eitlar eru sporöskju- eða baunlaga hnúðar á vessaæðum líkamans og koma oft fyrir í þyrpingum meðfram þeim. Þeir sía og hreinsa vessa sem berast frá vessaæðum inn í eitlana af framandi efnum.

Húðin er svo jafnan sögð stærsta líffæri mannsins. Hún verndar ytra byrði líkamans og er gerð úr mörgum lögum eins og sést á meðfylgjandi mynd.

Heimildir:

• Hver eru hlutverk heilakönguls og heiladinguls? eftir Þuríði Þorbjarnardóttur.
• Fun Trivia.
• Scum Doctor.
• is.wikipedia.org - Eitill.

Myndir:

• Þverskurðarmynd af heila - Wikipedia. Þýdd útgáfa fengin úr svari við spurningunni Hver eru hlutverk heilakönguls og heiladinguls? Sótt 20.6.2012.
• Vísindavefurinn: Ef maður sker af sér húðina á þumalfingri, kemur þá nákvæmlega sama fingrafar aftur? Sótt 20.6.2012.

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.