Gætu eldflugur lifað á Íslandi?

Svar

Eldflugur eru í raun ekki flugur heldur bjöllur af ættinni Lampyridae. Á ensku nefnast bjöllur af þessari ætt fireflies eða lightning bug. Rúmlega 1100 tegundir eru þekktar af bjöllum sem nota ljósmögnun (e. bioluminescence) til samskipta sín á milli, langoftast á pörunartímanum. Dýrin laða þá aðila af hinu kyninu að sér með ljósmerkjum en einnig þekkist það að þau noti sömu aðferð til að lokka væntanlega bráð til sín.

Ekki er hægt að útiloka að eldflugur festi hér rætur.

Eldflugur finnast víða kringum miðbaug og einnig á tempruðum svæðum. Eldflugur eru algengar víða í sunnanverðri Asíu og tegundir af ættkvíslinni Photuris finnast víða í sunnanverðum Bandaríkjunum og Mexíkó. Tegundin Photuris lucicrescens finnst í Norður-Ameriku við vötnin miklu og í Evrópu lifir tegundin Lampyris noctiluca á vestanverðum Bretlandseyjum. Bæði á Bretlandseyjum og nyrst á útbreiðslusvæði Photuris lucicrescens eru vetur oft kaldir, sérstaklega inn til landsins í Bandaríkjunum. Það er því ekki hægt að útiloka að þessar tegundir festi hér rætur og finni sinn sess í vistkerfinu ef hlýnun heldur áfram.

Mynd:

• en.wikipedia.org - Firefly: Photuris lucicrescens. Sótt 14.5.2012.