Hvað verpir snæugla mörgum eggjum?

Svar

Snæuglan (Bubo scandiacus) er stærri en flestar aðrar uglur. Hún er 51-71 cm að lengd og vegur 1,6-3 kg. Vænghaf hennar er allt að 170 cm. Snæuglan er hvít með brúnum skellum en brúni liturinn er meira áberandi á kvenkyninu. Snæuglur geta orðið meira en 10 ára gamlar.

Snæugla með unga.

Snæuglan verpir yfirleitt 5-8 eggjum en þegar fæðuframboð er gott getur hún verpt allt að 14 eggjum. Stofnstærð snæuglunnar á tilteknu svæði sveiflast gjarnan mikið milli ára, oftast í takt við stofnstærð læmingja á svæðinu, en þeir eru ein meginfæða snæuglunnar. Uglan verpir aðeins einu eggi í senn og oftast líða einn eða tveir dagar milli eggja. Eggin klekjast út eftir 32-34 daga. Ungarnir fara úr hreiðrinu eftir 25 daga en fara ekki að fljúga fyrir eftir 50-60 daga.

Hreiðrin eru á jörðinni en eru oftast höfð þar sem útsýni er gott. Karluglan veiðir til matar og stendur vörð um hreiðrið á meðan kvenuglan liggur á eggjunum en bæði karl- og kvenuglan ráðast á dýr sem ógna ungunum. Snæuglan verndar egg sín og unga ákaflega vel og ræðst á alla sem koma of nálægt hreiðrinu, jafnvel úlfa.

Heimildir:

• en.wikipedia.org - Snowy owl.
• National Geographic - Snowy owl.
• owlpages.com.
• Hvað lifir snæugla lengi? eftir Jón Má Halldórsson.

Mynd:

• Wikimedia Commons. Ljósmyndari er Tony Hisgett. Myndin er birt undir Creative Commons-leyfi. Sótt 19. 6. 2012.

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2012.