Hvers vegna suða rafmagnstæki rétt áður en farsímar hringja eða SMS-skilaboð berast? - Myndband

Svar

Upplýsingar berast til og frá farsímum með rafsegulbylgjum. Rafmagnstæki sem eru nálægt farsímum, yfirleitt hátalarar, fara stundum að suða rétt áður en við heyrum símann hringja. Ástæðan er sú, að á meðan farsíminn og símkerfið eru að semja sín á milli um það hvernig skuli setja upp símtalið, sendir farsíminn frá sér talsvert kraftmeiri rafsegulbylgjur en venjulega, á formi stuttra púlsa.

Á meðan á þessum stuttu samningaviðræðum stendur, þá virka óvarðir vírar í hátölurunum sem loftnet og púlsarnir breytast í hljóðmerki sem við heyrum. Þegar símtalið sjálft hefst, þá lækkar farsíminn sendiaflið og því heyrist ekki lengur í honum.


Hægt er að lesa meira um suð í rafmagnstækjum í svari Hrefnu Marínar Gunnarsdóttur við spurningunni Hvers vegna suða rafmagnstæki rétt áður en farsímar hringja eða SMS-skilaboð berast?

Myndbandið er einnig aðgengilegt á YouTube-síðu Vísindavefsins og á Vimeo. Myndbandið er unnið í samstarfi við Áttavitann.