Af hverju er þvag gult?

Svar

Þvag er venjulega gult eða gulbrúnt að lit og má rekja lit þess til svokallaðra galllitarefna sem myndast í lifrinni. Gula galllitarefnið gallrauða er losað út í smáþarmana en þegar það berst í ristilinn eru bakteríur sem breyta því í annað efni sem kallast úróbílónógen. Hluti af úróbílónógeninu berst í þvag þar sem það oxast í úróbílín, en þessi tvö efni eru þvaglitarefnin.

Það er ýmislegt sem getur haft áhrif á hversu ljóst eða dökkt þvag er, til dæmis hversu mikið við drekkum eða hvað við borðum. Rammt þvag er til að mynda dekkra en þunnt, þvagið verður rauðleitt eftir neyslu rauðrófna og skærgult ef teknar eru inn sterkar B-vítamíntöflur. Ýmsir sjúkdómar og lyf geta einnig haft áhrif á lit þvagsins. Til dæmis verður það dekkra ef blóð er í þvaginu, en það getur verið vísbending um einhvern sjúkdóm svo nýrnasteina, nýrnabólgu eða sýkingar í þvagkerfi.

Nánar er fjallað um þvag og lit þess í svari Þuríðar Þorbjarnardóttur við spurningunni: Hvað stjórnar lit á hægðum og þvagi fólks?. Einnig má benda á svari við spurningunni Hvaða hlutverk hefur gallblaðran og hvaða áhrif hefur það á líkamann ef hún er tekin?

---

Þetta svar er í flokknum "bekkirnir spyrja" þar sem starfsfólk vefsins svarar spurningum frá grunnskólabekk í kennslustund, samkvæmt samningi. Lögð er áhersla á skjót svör, stutt og aðgengileg. Oft er byggt á öðrum svörum sem kunna að nýtast almennum lesendum betur.