Eru segulpóll og norðurpóll ekki sami póllinn?

Nafn þitt

Netfang þitt

Netfang móttakanda

Ruslpóstvörn =

Svar

Eru segulpóll og norðurpóll ekki sami póllinn?
Nei, segulpóll og norðurpóll eru ekki sama fyrirbærið. Norðurpóll og suðurpóll eru þeir pólar þar sem jarðmöndullinn eða snúningsásinn sker yfirborð jarðar í norðri og suðri og eru skilgreindir sem breiddargráðurnar 90°N og 90°S.

Segulpólarnir sem finnast bæði í norðri í suðri eru ólíkir norður- og suðurpólunum að því leyti að þeir miðast við segulsvið jarðarinnar. Þetta þýðir að þegar einhver notar áttavita bendir nálin á segulpólinn á norðurheimskautinu en ekki endilega á norðurpólinn.

Um segulsvið jarðar segir þetta í svari við spurningunni Hvað eru pólskipti?:

[J]örðin hefur segulsvið í kringum sig, svipað að lögun eins og lítil straumspóla eða stangsegull í jarðmiðju mundi gera. Sá ímyndaði stangsegull stefnir því nokkurnveginn í átt að heimskautunum, en stefnan er þó flöktandi (um nokkrar gráður á öld) vegna þess að varmahreyfingar efnisins innan jarðkjarnans eru nokkuð breytilegar eins og í grautnum sem nefndur var.

Vísindamenn telja að orsök jarðsegulsviðsins séu rafstraumar í kjarnar jarðar. Hægt er að lesa meira um jarðsegulsviðið í fróðlegu svari við spurningunni Hvað veldur færslu á segulpólum jarðar og breytilegum hraða og stefnu færslunnar miðað við jarðmöndulinn?

Heimildir:

• Jörðin | Sólkerfið | Stjörnuskoðun. (Skoðað 25.06.2014).
• HowStuffWorks "Why does the North Pole move?" (Skoðað 25.06.2014).
• Norðurheimskautið - Wikipedia, frjálsa alfræðiritið. (Skoðað 25.06.2014).

Mynd:

• North Magnetic Pole - Wikipedia, the free encyclopedia. (Sótt 25.06.2014).

...