Hvað merkja stórar tölur sem málaðar eru við enda allra flugbrauta?

Nafn þitt

Netfang þitt

Netfang móttakanda

Ruslpóstvörn =

Svar

Hvað merkja stórar tölur sem málaðar eru við enda allra flugbrauta?
Á enda allra flugbrauta eru máluð með stórum stöfum númer. Númerin gefa til kynna hvernig brautin liggur miðað við segulstefnu jarðar, það er að segja þá stefnu sem nál í áttavita vísar á.

Í stað þess að nota tölur upp í 360, eins og gráður á áttavita, er notað tugakerfi þar sem fyrst er námundað að heilum tug og síðasta tölustaf í áttinni svo sleppt. Flugbrautir eru því númeraðar á bilinu 01 til 36, reyndar er 0 fyrir framan tölu sleppt í Bandaríkjunum en venjulega notað annars staðar. Þannig liggur braut sem merkt er 09 til austurs (90°), braut númer 18 vísar í suður (180°), braut 27 liggur í vestur (270°) og braut merkt 36 vísar í norður (360° frekar en 0°).

Venjulega eru flugbrautir notaðar í báðar áttir og því merktar á báðum endum. Mismunur talnanna er alltaf 18 þar sem munurinn á segulstefnu endanna er 180°. Braut sem er merkt 06 öðru megin hefur þar af leiðandi töluna 24 við hinn endann.

Nú er það þannig að segulskaut jarðar er á hreyfingu. Þetta veldur því númer flugbrauta geta ekki verið varanleg um aldur og ævi. Til dæmis fékk braut 02/20 á Keflavíkurflugvelli ný númer í lok apríl 2016 og tölur hennar eru nú 01/19.

Heimildir og mynd:

• Airport runways: What do those big numbers mean? - Stantec. (Skoðað 4. 10. 2016).
• Runway selection - www.airservicesaustralia.com. (Skoðað 4. 10. 2016).
• Runway - Wikipedia, the free encyclopedia. (Skoðað 4. 10. 2016).
• Segulskautið er á fleygiferð - vulkan.blog.is. (Skoðað 4. 10. 2016).
• ALLT UM FLUG.is - Daglegar fréttir úr heimi flugsins fyrir flugáhugamenn og venjulegt fólk líka. (Skoðað 4. 10. 2016).
• Mynd: Airport Runway To Reconstruct Runway 9 27 - Clipart Kid. (Sótt 4. 10. 2016).

---

Guðmundur Heimir Sveinbjörnsson flugstjóri fær bestu þakkir fyrir góðar ábendingar við gerð þessa svars.

...