Merkir Ítalía 'land kálfanna'? Hver er uppruni nafnsins?

Svar

Uppruni nafnsins Ítalía er ekki talinn fullljós. Orðið hefur oftast verið tengt latneska nafnorðinu vitulus sem merkir 'kálfur' og á sér til dæmis afkomanda í enska orðinu veal, 'kálfakjöt.' Á oskísku, sem telst til ítalískra mála eins og latína, hét landið Viteliu sem talið er merkja 'land hinna mörgu kálfa'. Einnig hefur verið bent á að landsheitið sé hugsanlega dregið af þjóðflokksheiti, Itali, 'ungu bolarnir'.