Hvað tákna hringirnir í ólympíufánanum? Táknar hver litur eitthvað sérstakt?

Svar

Hringirnir fimm tákna þær fimm heimsálfur sem taka þátt í Ólympíuleikunum. Það eru allar heimsálfurnar nema Suðurheimskautslandið sem er óbyggt. Hver hringur vísar þó ekki til einnar ákveðinnar álfu en litirnir sex – gulur, rauður, grænn, blár og svartur í hringunum og hvítur í grunninum – taka yfir litina í öllum þjóðfánum heims, að sögn hönnuðarins og stofnanda hinna nýju Ólympíuleika í lok 19. aldar, Baron Pierre de Coubertin. Hvítur grunnurinn stendur einnig fyrir þann frið sem ríkja skal milli þjóða á leikunum.


Einhverjir hafa síðar viljað tengja hvern lit einni heimsálfu:
Blár = Evrópa; gulur = Asía; svartur = Afríka; grænn = Ástralía og rauður = Ameríka.

Fánanum var fyrst flaggað á Ólympíuleikum í Antwerpen, 1920.

Frekara lesefni á Vísindavefnum:

• Hvenær voru fyrstu Ólympíuleikarnir haldnir? Hvers vegna? Hvaða íþróttir voru þá? eftir Hauk Má Helgason
• Í hvaða borgum og hvenær hafa nútímaólympíuleikarnir verið haldnir? eftir HMH
• Hvenær voru fyrstu Ólympíuleikar fatlaðra haldnir og hvar? eftir Ögmund Jónsson

Heimildir og frekari upplýsingar:

• Britannica.com
• Australian Sports Commission

Mynd:

• Wikipedia.com - Olympic Rings. Sótt 24.7.2012.