Framlag vísindasamfélagsins — upplýst umræða um COVID-19

Nafn þitt

Netfang þitt

Netfang móttakanda

Ruslpóstvörn =

Svar

Framlag vísindasamfélagsins — upplýst umræða um COVID-19
Vísindavefur Háskóla Íslands er opinn öllum fræðimönnum sem vilja leggja sitt af mörkum til upplýstrar umræðu um allt það sem tengist veirum og COVID-19.

Mikilvægi vísinda, sérfræðiþekkingar og samvinnu á sem flestum sviðum er öllum ljóst um þessar mundir og Vísindavefurinn og Háskóli Íslands hvetja vísindamenn sem vilja leggja sitt af mörkum til að senda inn efni af sem fjölbreyttustu tagi til birtingar á Vísindavefnum.

Framlögin geta verið hugsuð sem svör við tilteknum spurningum, tölulegar staðreyndir, ábendingar um traust og vandað vísindalegt efni í erlendum miðlum, leiðréttingar á rangfærslum, hagfræðileg ráðgjöf, svör við siðferðilegum álitamálum eða hvaðeina sem vísindamönnum dettur í hug að gagnist almenningi, stjórnvöldum, fjölmiðlafólki og öðrum á óvissutímum.

Hægt er að senda framlögin eða hugmyndir að framlögum á netfangið visindavefur@hi.is eða til einstakra aðila í ritnefnd.

Ritnefndin mun skoða efnið sem síðan birtast á Vísindavef HÍ, annað hvort sem svör við tilteknum spurningum, sem vísindafréttir eða á því formi sem best hæfir efninu. Efnið mun allt verða aðgengilegt í sérstökum flokki á Vísindavefnum sem kallast COVID-19 — upplýst umræða. Nú þegar er komið töluvert af efni eftir hóp vísindamanna inn í þann flokk.

Í ritnefnd þessa verkefnis eru:

• Arnar Pálsson, erfðafræðingur og prófessor í lífupplýsingafræði við HÍ
• Erna Magnúsdóttir, dósent í lífeinda- og líffærafræði við læknadeild HÍ
• Eyja Margrét Brynjarsdóttir, prófessor í heimspeki og hagnýtri siðfræði við HÍ
• Jóhanna Jakobsdóttir, líftölfræðingur hjá Miðstöð í lýðheilsuvísindum
• Jón Magnús Jóhannesson, deildarlæknir á Landspítalanum
• Jón Gunnar Þorsteinsson, ritstjóri Vísindavefsins
• Sigrún Ólafsdóttir, prófessor í félagsfræði við HÍ
• Snædís Huld Björnsdóttir, sameindalíffræðingur og dósent við Líf- og umhverfisvísindadeild HÍ
• Stefán Ragnar Jónsson líffræðingur

Ritnefndin mun einnig leita álits annarra sérfræðinga þegar þurfa þykir.

Hugmyndin að verkefninu er meðal annars byggð á átaki INGSA og á Staðreynda- og samfélagsvakt Vísindavefsins.

Rétt er að minna á að svör sem birtast á Vísindavefnum eru langoftast eftir nafngreinda höfunda sem bera þá ábyrgð á efni svaranna.

Lesandi sem telur svari áfátt getur bent ritnefnd og ritstjórn Vísindavefsins á það og er svar þá lagfært ef höfundur fellst á það.

Um verklag Vísindavefsins í þeim efnum má lesa um í svari við spurningunni Hvernig er brugðist við athugasemdum á Vísindavefnum?

Mynd:

• © Kristinn Ingvarsson.
...