Svöruðu Korintumenn aldrei bréfum Páls postula?

Nafn þitt

Netfang þitt

Netfang móttakanda

Ruslpóstvörn =

Svar

Svöruðu Korintumenn aldrei bréfum Páls postula?
Í 1 Kor 5:9 kemur fram að Páll postuli hafði skrifað bréf til Korintumanna áður en hann skrifaði Fyrra Korintubréf. Þetta bréf er nú glatað, en það hefur líklega verið ritað á árabilinu 51-54.

Í 1 Kor 7:1 kemur síðan fram að söfnuðurinn í Korintu hafði svarað Páli með bréfi, líklega um árið 54: „En varðandi það sem þið skrifuðuð …“ Orð þessi byrja á frasanum peri de á grísku, eða „en varðandi …“, sem er notaður þegar verið er að vísa í tiltekið efni sem viðmælandinn hafði spurst fyrir um. Þannig má sjá nokkur af þeim málefnum sem Korintumenn höfðu spurt Pál út í í bréfi sínu til hans:

• En varðandi hreinar meyjar … (7:25)
• En varðandi kjöt sem fórnað hefur verið skurðgoðum … (8:1)
• En varðandi andlegar gáfur … (12:1)
• En varðandi söfnunina fyrir hina heilögu … (16:1)

Þetta eru þau málefni sem Páll hefur valið að svara í Fyrra Korintubréfi.

Síðara Korintubréf geymir síðan ýmsar vísbendingar um að frekari bréfaskipti hafi átt sér stað. Það sem við þekkjum sem Síðara Korintubréf kann hins vegar að innihalda fleiri en eitt bréf sem skeytt hefur verið saman í einn samhangandi texta. Þessi bréf gætu upprunalega hafa verið allt að sex að tölu. Hugsanlegt er að Korintumenn hafi svarað einhverjum af þessum bréfum, en það er ekki vitað með vissu þar sem Páll minnist ekki beinlínis á slík bréf í Síðari Korintubréfi.

Korintumenn svöruðu sem sagt einhverjum bréfum Páls postula en einu heimildirnar sem við höfum um það eru bréf Páls.

Mynd:

• Ancient Theater in Archeological site of Ancient Corinth" eftir Chris Oxford á English Wikipedia. Birt undir leyfinu CC BY-SA 3.0.

...