Hversu langt er eitt ljósár? Hversu hratt þyrfti maður að ferðast til að ná þangað á einu ári?

Svar

Ljósár er vegalengdin sem ljós ferðast á einu ári í tómarúmi. Því þarf maður að ferðast á ljóshraða til að 'ná þangað á einu ári' en eins og útskýrt er í þessu svari Þorsteins Vilhjálmssonar er það ekki hægt.

Einingin ljósár er mikið notuð í stjarnvísindum þar sem einingar á borð við metra og kílómetra hrökkva ekki til að lýsa óravíddum alheimsins. Eitt ljósár jafngildir 9,4605 * 10¹⁵ m. Aðrar einingar sem mikið eru notaðar í stjarnvísindum eru parsek, pc, og stjarnfræðieining (astronomical unit), AU. 1 pc jafngildir 3,26 ljósárum og er heppileg eining í stjarnvísindum, því að hún er nátengd ákveðinni aðferð við að mæla hversu langt stjarna er frá jörðu. 1 AU jafngildir hins vegar 1,4960 * 10¹¹ m og er skilgreint sem meðalfjarlægð jarðar frá sólu.