Hvað eru punktar í lánum?

Svar

Hugtakið punktur er notað í fjármálaheiminum til að tákna einn hundraðasta úr einu prósenti, það er 0,01%. Vaxtakjör eru oft tilgreind sem tiltekið álag ofan á eitthvert viðmið og álagið þá gefið upp í punktum.

Til dæmis gæti lán í evrum verið veitt með 50 punkta álagi ofan á þá vexti sem bönkum bjóðast í evrum á millibankamarkaði í London (LIBOR-vextir). Ef millibankavextirnir eru 5% þá væri lánið veitt með 5,5% vöxtum. Álagið er hér hálft prósentustig eða 50/100%.

Frekara lesefni á Vísindavefnum:

• Hvað eru stýrivextir? eftir Gylfa Magnússon
• Hvað eru flatir vextir? eftir Gylfa Magnússon

Spurningin hljóðaði upprunalega svona:

Hvernig virka punktar í lánum, þessir lánshæfispunktar? Talað er um 1000 punkta lán og hvað telst vera gott lán í punktum?