Hvernig vitum við að svarthol séu til?

Svar

Þyngdarsvið svarthols er svo sterkt að ljósið sleppur ekki einu sinni frá því. Því ætti að vera ómögulegt að sjá svarthol. Hins vegar er hægt að nota óbeinar aðferðir til þess að finna svarthol, til dæmis með því að skoða hreyfingu stjarna umhverfis ósýnileg en massamikil fyrirbæri.

Árið 1971 fundu stjarneðlisfræðingar fyrirbærið Cygnus X-1 þar sem venjuleg sólstjarna snýst í kringum ósýnilegt fyrirbæri sem hefur 9 sinnum meiri massa en sólin okkar og hlýtur því að vera svarthol. Stjörnufræðingar telja einnig að svarthol sé að finna í miðju margra vetrarbrauta. Hröð hreyfing stjarna nálægt miðju Vetrarbrautarinnar okkar bendir til þess að þar sé svarthol sem er tveimur milljón sinnum massameira en sólin okkar. Talið er að svarthol í miðju vetrarbrautarinnar Messier 87 sé enn stærra eða um þrír milljarðar sólarmassa.

Hægt er að lesa meira um svarthol í svörum við spurningunum Hvað er svarthol? og Hvernig uppgötvuðust svarthol?.


Mynd frá Hubblesjónaukanum af miðju vetrarbrautarinnar Messier 87. Þaðan streymir gas á ógnarhraða og býr til risastóran gasstrók sem sést á myndinni.

Mynd:

• NASA

---

Þetta svar er í flokknum "bekkirnir spyrja" þar sem starfsfólk vefsins svarar spurningum frá grunnskólabekk í kennslustund, samkvæmt samningi. Lögð er áhersla á skjót svör, stutt og aðgengileg. Oft er byggt á öðrum svörum sem kunna að nýtast almennum lesendum betur.