Hvað er þetta kruss í þvers og kruss?

Svar

Orðasambandið þvers og kruss merkir ‛í allar áttir; út um allt, fram og aftur’. Orðið þvers er notað á sama hátt og þvert og þversum.

Kruss er dregið af sögninni krusa eða krussa sem í sjómannamáli er notuð um að sigla skáhallt gegn vindi (á vígsl á báða bóga) en er einnig notuð um að fara krákustíg, stefna sitt á hvað. Í Íslenskri orðsifjabók Ásgeirs Blöndals Magnússonar (1989:511) er þess getið að sögnin sé tökuorð úr dönsku krydse í sömu merkingu. Þótt bæði orðin séu til í íslensku er sambandið sjálft fengið að láni úr dönsku på kryds og tværs í sömu merkingu og íslenska orðasambandið.

Kruss er komið úr sjómannamál. Með hjálp áttavita geta menn gætt sín að fara ekki þvers og kruss!

Mynd:

• en.wikipedia.org - Compass. Sótt 14.5.2012.