Getur fólk sem hefur ekki stúdentspróf sótt námskeið við Háskóla Íslands, til dæmis í jarðfræði?

Svar

Almennt gildir við Háskóla Íslands að þeir einir mega skrá sig í námskeið við skólann sem lokið hafa stúdentsprófi, en til þess að innritast í námskeið í jarðfræði þurfa menn að hafa lokið stúdentsprófi með minnst 30 einingum í náttúruvísindum og 21 einingu í stærðfræði.

Háskólanum er heimilt að veita undanþágur frá inntökuskilyrðum, en heimildin hefur hins vegar ekki verið nýtt undanfarin ár.

Fólk sem ekki uppfyllir inntökuskilyrði getur sótt um leyfi kennara í viðkomandi námskeiði til að sitja í fyrirlestrum og fylgjast með. Ef slíkt leyfi er veitt fær viðkomandi ekki að skila inn verkefnum eða taka próf, og fær að sjálfsögðu engar einingar fyrir námskeiðin.



Jarðfræði er kennd í Öskju, Náttúrufræðahúsi Háskóla Íslands. Með leyfi kennara er hægt að sitja námskeið í jarðfræði án stúdentsprófs en slíkt gefur engar einingar.
Reglur um inntöku nýrra stúdenta í Háskóla Íslands er að finna á heimasíðu kennslusviðs HÍ. Á síðu Raunvísindadeildar er að finna upplýsingar um þær kröfur sem gerðar eru til stúdenta sem vilja hefja nám í deildinni, jarðfræði þar með talin.

Mynd: Framkvæmdasýsla ríkisins