Sólin
Rís 05:19 • sest 21:35
Tunglið
Rís 25:18 • Sest 04:56
Flóð
Árdegis: 07:07 • Síðdegis: 19:24
Fjara
Árdegis: 01:08 • Síðdegis: 13:14
Mest hefur fundist af beinum, bæði heilum og brotnum, og stundum hafa fundist heillegir hlutar úr beinagrind og jafnvel heilar beinagrindur. Út frá slíkum leifum er oft unnt að komast að ýmsu um útlit dýranna, að minnsta kosti í megindráttum, og má í því sambandi benda á að á beinunum eru oft vöðvafestingar sem geta gefið upplýsingar um legu og stærð vöðva og í þeim eru einnig op og rör fyrir æðar og taugar. Í kjálkum má oft sjá tennur, sem gefa upplýsingar um tanngerðir og mataræði dýranna, og stærð augnatófta getur sagt til um augnastærð og stærð nasaröra um nasaop. Horn á hauskúpum varðveitast yfirleitt frekar vel. Þá hafa einstaka sinnum fundist hlutar úr vöðvum og húð dýranna, einkum þeirra sem hafa grafist í mjög fínkornótt setlög, og saurkúlur geta gefið ýmsar upplýsingar um meltingarfærin og fæðuna. Einnig hefur fundist talsvert af eggjum sumra þessara dýra og jafnvel heilu hreiðrin, til dæmis frá horneðlu í Mongólíu. För eftir heillegar risaeðlur eða hluta úr einstaka dýrum hafa stundum mótast í setlögin sem leifar þeirra finnast í og markar þá fyrir útlínum dýranna. Fótspor eftir risaeðlur hafa fundist hér og þar og stundum má af formi þeirra og dýpt ráða í stærð og jafnvel þyngd dýranna, og einnig geta sporin sagt okkur til um hvort dýrin fóru saman í hópum eða voru einfarar. Þannig má til dæmis sjá að sumar af stærstu jurtaætunum fóru saman í hópum og höfðu þá ungviðið inni í hring fullvaxinna dýra. Talið er líklegt að litur dýranna hafi verið svipaður og hjá núlifandi skriðdýrum, en flestar risaeðlur virðast hafa verið með beinflögur í húðþekjunni. Gert er ráð fyrir að smærri tegundir og ungviði hafi haft liti sem féllu vel að umhverfinu, til dæmis grænleitar eðlur þar sem gróður var mikill, en hinar hafi ef til vill gráleitari sem höfðust við á opnari og gróðursnauðari svæðum. Þá er talið sennilegt að karldýrin hafi fengið meira áberandi liti í tilhugalífinu, til dæmis á höfði og baki, eins og sést hjá mörgum núlifandi eðlum. Húðleifar, sem hafa fundist í mjög fínkornóttum setlögum, virðast frekar styðja þessar tilgátur, en því er ekki að neita að litarefni í húð varðveitast illa í jarðlögum. Fleiri svör um risaeðlur: Svör sama höfundar við spurningunum Hvernig varð fyrsta risaeðlan til?, Hver var stærsta risaeðlan? og Hver var minnsta risaeðlan og hvernig var andrúmsloftið þegar hún lifði? Svar Guðmundar Eggertssonar við Er einhvers staðar til erfðaefni úr risaeðlum og væri hægt að láta þær koma aftur? Svar Sigurðar Steinþórssonar við Er vitað hvers vegna risaeðlur dóu út?
Mynd: Úr BBC sjónvarpsþáttunum: Walking With Dinosaurs