Sólin
Rís 05:40 • sest 21:16
Tunglið
Rís 15:13 • Sest 05:59
Flóð
Árdegis: 03:57 • Síðdegis: 16:31
Fjara
Árdegis: 10:23 • Síðdegis: 22:34
Blettatígurinn (Acinonyx jubatus) er sprettharðasta landspendýr heims. Á stuttum sprettum getur hann náð yfir 100 km hraða á klst. Þess má geta til samanburðar að bestu hundrað metra hlauparar meðal manna fara þá vegalengd á 10 sekúndum sem samsvarar 36 km á klst. Við mundum því ekki komast langt á hlaupum undan blettatígri! Blettatígurinn er mjög vel aðlagaður slíkum hlaupum; hann er meðal annars tiltölulega léttbyggður samanborið við önnur stór kattardýr (frá 35 til 60 kg að þyngd), með lítinn haus og mjög langar lappir. Blettatígurinn getur ekki dregið klærnar inn eins og önnur kattardýr. Það tekur blettatígurinn aðeins um 3 sekúndur að ná 90 km/klst. Samkvæmt rannsóknum getur hann haldið slíkum hraða, og jafnvel meiri, í að minnsta kosti 20 sekúndur og allt upp í 40-50 sekúndur. Þó er óalgengt að blettatígrar haldi út á hámarkshraða í meira en hálfa mínútu. Árangur veiðiatlögunnar veltur á þessum stutta tíma. Þessi veiðiaðferð reynist blettatígrinum einstaklega árangursrík því rannsóknir hafa sýnt að 50% af tilraunum blettatígursins enda með veiði. Oft gerist það reyndar að blettatígurinn er rændur bráðinni og þar eru oftast hýenur og ljón að verki.
