Sólin
Rís 09:05 • sest 17:17
Tunglið
Rís 17:01 • Sest 24:15
Flóð
Árdegis: 00:06 • Síðdegis: 12:49
Fjara
Árdegis: 06:08 • Síðdegis: 19:25
Til að sýna trúrækni sína klæðist gyðingur bænasjali með kögri við morgunbænina. Sjalið sem er ferhyrnt kallast tallith en kögrið zizith. Kögrið sem er bundið eftir vissum reglum er fest á hornin og snerta gyðingar það meðan þeir biðja. Sjölin eru oftast gerð úr ull, bómull eða silki. Mörg þeirra eru með svörtum eða bláum röndum.
Kögrið hefur meira táknrænt gildi en sjalið og vanalegt er að trúræknir gyðingar séu grafnir með bænasjal sem búið er að klippa kögrið af.
Gyðingarnir bera einnig á sér lítil svört bænabox sem í eru ritningarorð úr Mósebókum. Bænaboxin eru fest við enni og vinstri handlegg. Þessi siður er tilkominn vegna túlkunar rabbína, presta gyðinga á eftirfarandi versi úr 2. Mósebók:Og þetta skal vera þér til merkis á hendi þinni og til minningar á milli augna þinna, svo að lögmál Drottins sé þér æ á vörum, því með voldugri hendi leiddi Drottinn þig út af Egyptalandi.Gyðingar umgangast svörtu bænaboxin af mikilli virðingu og mega hvorki missa þau í gólfið né fara með þau á illan stað. Líkt og er um sjölin eru það eingöngu karlar 13 ára og eldri sem bera þessa hluti við bænagjörð.
Í virðingaskyni við Guð hylja Gyðingar höfuð sitt þegar þeir biðja, annaðhvort með svörtum höttum eða svokölluðum kollhúfum sem kallast kippah á hebresku. Kollhúfurnar kallast yarmulke á jiddísku sem er tungumál sem er sambland af þýskum, hebreskum og slavneskum orðum og aðallega talað af Gyðingum í Rússlandi og Mið-Evrópu. Guðhræddir Gyðingar hylja höfuð sitt öllum stundum með kollhúfum vegna þeirrar trúar sinnar að Guð sé alltaf nálægur.
Engar reglur eru til um hvernig kollhúfurnar eigi að vera. Þær geta því verið í allskyns litum og skreyttar ólíku munstri. Í kollhúfur drengja er oft saumað nafnið þeirra.
HeimildirBritannica Online
Spotlight on Israel
Encarta
