Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

Er sams konar kísill (silíkon) í brjóstunum á Pamelu Anderson og í tölvukubbunum mínum?

Þessari spurningu má bæði svara játandi og neitandi. Frumefnið kísill (e. silicon) er eitt af algengustu frumefnum á jörðinni og er, ásamt súrefni, uppistaðan í steinum, sandi og gleri.

Kísill er mikilvægur þáttur í íslenskri stóriðju. Á hverju ári eru yfir 100.000 tonn af kísiljárni til stálframleiðslu flutt út frá Járnblendiverksmiðjunni á Grundartanga og um 25.000 tonn af kísilgúr voru framleidd í kísiliðjunni við Mývatn. Í náttúrunni finnst kísill aðeins í efnasamböndum, aðallega með súrefni. Hreinan kísil er hægt að einangra úr slíkum náttúrulegum efnasamböndum og er hann glansandi að sjá - líkt og málmur - og hefur sérstaka rafleiðnieiginleika. Inni í langflestum tölvukubbum og öðrum örrásum eru þunnar kísilflögur sem sagaðar eru úr feiknastórum og ofurhreinum kísilkristöllum.

Það sem kallað er á íslensku í daglegu tali "silíkon" (e. silicone) á hins vegar við flokk efna þar sem kísill og súrefni koma við sögu, en einnig lífræn efnasambönd. Þar á meðal eru ýmsar olíur og gel sem meðal annars má finna í hreinsiefnum, snyrtivörum og í púðum sem gerðir eru til ígræðslu í líkamann. Konur sem hafa "sílíkon" í brjóstunum bera þess vegna á sér nokkurt magn af kísli, þó svo að hann sé ekki á sama hreina formi og finna má í tölvukubbum.

Áhugasamir geta lesið ítarlega skýrslu óháðs rannsóknarhóps um brjóstaaðgerðir með "silíkoni" á slóðinni http://www.silicone-review.gov.uk/. Þess ber ef til vill að geta að Pamela Anderson lét fjarlægja "silíkonið" úr brjóstunum árið 1999.



Teikning: HB

Mynd af Pamelu Anderson: Af vefsetri sjónvarpsþáttarins Baywatch

Útgáfudagur

8.4.2002

Spyrjandi

Hans Pétursson, fæddur 1986

Höfundur

Kristján Leósson

eðlisverkfræðingur

Tilvísun

Kristján Leósson. „Er sams konar kísill (silíkon) í brjóstunum á Pamelu Anderson og í tölvukubbunum mínum?“ Vísindavefurinn, 8. apríl 2002. Sótt 18. nóvember 2017. http://visindavefur.is/svar.php?id=2275.

Kristján Leósson. (2002, 8. apríl). Er sams konar kísill (silíkon) í brjóstunum á Pamelu Anderson og í tölvukubbunum mínum? Vísindavefurinn. Sótt af http://visindavefur.is/svar.php?id=2275

Kristján Leósson. „Er sams konar kísill (silíkon) í brjóstunum á Pamelu Anderson og í tölvukubbunum mínum?“ Vísindavefurinn. 8. apr. 2002. Vefsíða. 18. nóv. 2017. <http://visindavefur.is/svar.php?id=2275>.

Chicago | APA | MLA

Sendu inn spurningu
eða

Vísindadagatalið

Negull

Negull er krydd úr þurrkuðum blómhnöppum negultrésins. Hann er eitt þekktasta krydd veraldar og fyrr á öldum var hann einokunarvara Portúgala og Hollendinga. Hann er ýmist notaður malaður eða heill. Negull er notaður í bakstri og í ýmsa austurlenska rétti, svo og til að krydda ýmsa kjötrétti. Negull er ilmríkur og sums staðar er hefð að stinga negulnöglum í appelsínu og hengja upp fyrir jólin.