Kettir og hundar eru án efa vinsælustu gæludýr í heimi en vissulega eru þetta mjög ólík dýr.

Kötturinn er mikill einfari og vill vera eins síns liðs. Læður mynda þó félagsleg tengsl við kettlingana sína og við fressketti á mökunartímanum en að öðru leyti er varla hægt að segja að kötturinn myndi félagsleg tengsl. Þá mynda fresskettir tengsl við læðurnar á mökunartímanum en að öðru leyti vilja þeir fá að vera í friði.

Allt aðra sögu er að segja af hundum því að þeir eru hópdýr. Villihundar og úlfar halda sig til dæmis yfirleitt í hópum allt sitt líf. Heimilishundar vilja því gjarnan vera sem mest með þeirri fjölskyldu sem hann tilheyrir.

En af hverju er erfiðara að þjálfa kött en hund? Hugsanlega skýringu má finna í ólíku félagsmynstri þessara dýra. Hjá hundum er meiri hvatning til þess að læra en hjá köttum. Hundar verða að geta lært ef þeir eiga að geta fótað sig í hópi og tileinkað sér þær reglur sem ríkja í hópnum sem þeir tilheyra. Menn eiga því tiltölulega auðvelt með að temja hundana sína til þeirra fjölmörgu starfa sem hundar gegna í þjónustu við okkur mennina. Kettir eru á hinn bóginn engum háðir og eru einfarar að mestu. Erfitt ef ekki ómögulegt er að þjálfa ketti þvi þeir hafa enga ástæðu til þess að læra eitt né neitt af því að þeir þurfa ekki að þrífast í hópi.

Þess má líka geta til gamans að það er ekki tilviljun hvaða dýrategundir hafa orðið húsdýr hjá mönnum, því að langflestar dýrategundir er blátt áfram ekki hægt að temja!

Myndin er á vefsetrinu www.doradca.com