Hvenær var Evrópusambandið stofnað og hvaða lönd eru í því núna?

Nafn þitt

Netfang þitt

Netfang móttakanda

Ruslpóstvörn =

Svar

Hvenær var Evrópusambandið stofnað og hvaða lönd eru í því núna?
Fyrsta bandalagið sem yfirleitt er talið til fyrirrennara ESB var Kola- og stálbandalag Evrópu (KSB; European Coal and Steel Community, ECSC) frá 1952. Í því voru sex ríki í Vestur-Evrópu: Frakkland, Vestur-Þýskaland, Ítalía, Belgía, Holland og Lúxemborg. Árið 1958 stofnuðu sömu ríki tvö bandalög til viðbótar: Efnahagsbandalag Evrópu (EBE; European Economic Community, EEC) og Kjarnorkubandalag Evrópu (European Atomic Energy Community, EURATOM). Árið 1967 færðust KSB, EBE og EURATOM undir eina stjórn og voru þá nefnd einu nafni Evrópubandalögin.

Árið 1993 var nafninu á sáttmálanum um Efnahagsbandalag Evrópu breytt í sáttmálann um Evrópubandalagið (EB; European Community, EC). Samtímis var sáttmálinn um Evrópusambandið (ESB; European Union, EU) undirritaður. Hann tók yfir öll starfsvið Evrópusamstarfsins og fól meðal annars í sér stoðaskipulag. Í fyrstu stoðinni voru KSB, EURATOM og EB (áður EBE). Önnur stoð rúmaði sameiginlegu stefnuna í utanríkis- og öryggismálum og í þriðju stoðinn var komið fyrir samvinnu í lögreglu- og dómsmálum. Í daglegu tali varð Evrópusambandið fljótlega samheiti yfir allt það sem fram fór í stoðunum þremur.

Árið 2009 var stoðaskipulagið afnumið. Efni þriðju stoðar hafði þá að miklu leyti verið tekið inn í sáttmálann um Evrópubandalagið og árið 2002 rann 50 ára gildistími Kola- og stálbandalagsins út. Heitið Evrópubandalagið var með öllu lagt niður og sáttmálinn um Evrópubandalagið fékk heitið sáttmálinn um starfshætti Evrópusambandsins. Í dag eru því samhliða í gildi sáttmálar um EURATOM og Evrópusambandið. ESB grundvallast á tveimur sáttmálum: sáttmálanum um starfshætti Evrópusambandsins, sem var upphaflega undirritaður í Róm 1957, og sáttmálanum um Evrópusambandið, sem var fyrst undirritaður í Maastricht 1992.

Nú eru Evrópusambandsríkin 27 talsins. Undir tenglinum er hægt að fá nánari upplýsingar um hvert og eitt ríki.

Myndir:

• EU countries. (Sótt 17.02.2026).
• Þórhildur Hagalín, 2011: Skýringarmynd af þróun og skipulagi Evrópusambandsins. Með hliðsjón af en.wikipedia.org - Template: EU evolution timeline.

...