Hvernig er pappír endurunninn?

Nafn þitt

Netfang þitt

Netfang móttakanda

Ruslpóstvörn =

Svar

Hvernig er pappír endurunninn?
Við endurvinnslu á pappír er leitast við að ná ákveðinni blöndu af trefjamassa sem miðast við þá vöru sem verið er að framleiða hverju sinni. Við framleiðslu á salernispappír er til dæmis ákveðnum hlutföllum af skrifstofupappír (meiri gæði, fleiri trefjar) blandað saman við dagblaða- og tímaritapappír (minni gæði) og svo er yfirleitt eitthvað af frumunnu efni, það er trefjum unnum úr trjám, bætt við. Þessi hlutföll breytast síðan eftir því hvaða vöru er verið að framleiða hverju sinni. Þar sem skrifstofupappír er í hærri gæðaflokki en dagblöð og tímarit er hann verðmætari og þar af leiðandi kostar minna (móttökugjöld) að skila flokkuðum skrifstofupappír en blönduðum pappír til SORPU.

Pappír í endurvinnslu.

Hin eiginlega tæknilega lausn við endurvinnslu pappírs er flókin og eru framleiðendur oft tregir til að láta eitthvað uppi um „sína“ tæknilausn. Þó má almennt segja að vinnslan felst í að búa til einhvers konar kvoðu (e. pulp) úr þeim pappír sem skal endurvinna og er henni síðan blandað við nýtt hráefni. Einnig þarf að ná límböndum, plasti, heftum og bleki af pappírnum áður en hann fer í framleiðslu á nýjum pappír. Almennt má skipta endurvinnslu á pappír í eftirfarandi skref:

• Pappírinn er hakkaður og búin til úr honum kvoða
• Hreinsun (til dæmis hefti, plast og svo framvegis)
• Sigtun (hreinsar stærri óhreinindi)
• Þvottur
• Fleyting
• Trefjahreinsun (e. dispersion og kneading, blek hreinsað af trefjum)
• Bleiking

Þegar pappírinn hefur farið í gegnum þessi skref er kvoðunni blandað saman við trefjar úr trjám, vatn og önnur efni sem notuð eru við pappírsframleiðslu og við tekur sambærilegur ferill og í venjulegri pappírsframleiðslu. Í örstuttu máli er vatnssósa blöndunni sprautað í þunnt lag á grind eða net þar sem vatnið lekur úr en trefjarnar festast saman. Þetta lag er svo pressað til þess að ná vatninu betur úr og síðan hitaþurrkað. Pappírinn, sem nú er orðinn til, er settur á stórar rúllur, allt að 10 metra langar og 20 tonn að þyngd, sem eru svo ýmist sendar heilar eða skornar niður í smærri einingar til verksmiðja sem vinna úr honum.

Á heimasíðu TAPPI - The Leading Technical Association for the Worldwide Pulp, Paper and Converting Industry er að finna ágæta lýsingu á endurvinnslu pappírs í máli og myndum.

Heimild og mynd:

• Richard A. Venditti - Dept. of Wood and Paper Science, North Carolina State University
• Dept. of Plant Biology - Southern Illinois University

...