Nýlega var sett upp skilti með nafninu "Gorvík" við víkina sem liggur milli Geldinganess og Blikastaðaness (fyrir neðan golfvöllinn við Korpúlfsstaði). Er eitthvað vitað um uppruna þessa örnefnis? Ég veit að "gor" þýðir hálfmelt fæða úr innyflum dýra. Hefur örnefnið þá einhverja tengingu við slátrun dýra?Í Hvalfirði er Gorvík sem nefnd er í Harðar sögu og Hólmverja. Hólmverjar eru þar sagðir hafa drepið fé á skipi í víkinni og tengir höfundur örnefnið þannig við gor í merkingunni ‚hálfmelt fæða úr innyflum jórturdýra‘. Í botni Gorvíkur í Hvalfirði er leir og mjög fíngerður sandur. Gorvík niður undan Korpúlfsstöðum er líka með leirbotni. Þórhallur Vilmundarson skrifaði í inngangi að útgáfu Harðar sögu að líklega væri orðið gor hér í merkingunni ‚for, leðja‘, samanber bæjarnafnið Gorvik í Noregi þar sem sú merking er talin liggja að baki.

Reykjavíkurborg hefur sett upp fræðsluskilti í Gorvík um lífríki fjörunnar. Á vef borgarinnar segir meðal annars: Gorvík er lítil vík rétt fyrir austan Geldinganes fyrir norðan Grafarvogshverfið. Þar er blönduð fjara, þónokkur þangfjara þótt ekki sé mjög stórgrýtt, en einnig sandfjara og leirur sem tengjast víðáttumiklu leirunum við Blikastaðakró eilítið austar.
- Ásgeir Blöndal Magnússon, Íslensk orðsifjabók. Reykjavík 1989.
- Harðar saga. Íslenzk fornrit XIII. Þórhallur Vilmundarson og Bjarni Vilhjálmsson gáfu út. Reykjavík 1991.
- Íslensk orðabók. Þriðja útgáfa, aukin og endurbætt. Ritstjóri: Mörður Árnason. Reykjavík 2005.
- Mynd: Ný fræðsluskilti um lífríki fjörunnar | Reykjavíkurborg. (Sótt 2. 6. 2015).