Hvaða þrautir leystu Vopnfirðingar á vísindaveislu Háskólalestarinnar?

Nafn þitt

Netfang þitt

Netfang móttakanda

Ruslpóstvörn =

Svar

Hvaða þrautir leystu Vopnfirðingar á vísindaveislu Háskólalestarinnar?
Háskólalestin nam staðar í Vopnafirði 15.-16. maí 2015. Í vísindaveislu í félagsheimilinu Miklagarði laugardaginn 16. maí fengu gestir að kynna sér ýmis undur eðlisfræðinnar, klæðast japönskum búningum, læra um sameindir og atóm og taka þátt í tilraunum næringarfræðinga, svo nokkur dæmi séu nefnd.

Vísindavefur HÍ leggur ýmsar gátur og þrautir fyrir heimamenn í vísindaveislum. Vopnfirðingar voru úrræðagóðir og fjölmargir leystu þrautirnar með glæsibrag, þar á meðal margir nemendur úr Vopnafjarðarskóla. Rétt er að hrósa sérstaklega þremur gestum.

Fyrst ber að nefna lyftaramanninn Kristján Guðjónsson hjá HB Granda á Vopnafirði. Hann var sá fyrsti sem leysti þrjár þrautir. Hann raðaði teningi saman örugglega, leysti jafnvægisþraut léttilega og var einkar snöggur að leysa átta drottninga vandamálið, en það var fyrst sett fram árið 1848. Kristján lét þess getið að þótt hann hafi ekki teflt að ráði í 20 ár komi það stundum fyrir að vinnufélagar dragi hann að taflborðinu. Að eigin sögn mátar hann þá alltaf, „enda er skákin engin vísindi, það þarf bara að sjá fyrir næstu leiki andstæðingsins.“

Einungis einn gestur til viðbótar náði að leysa þrjár þrautir en það var íslenskukennarinn Unnur Ósk Unnsteinsdóttir, ættuð frá Þórshöfn. Reyndar er óhætt að segja að með sinni frammistöðu hafi Unnur skákað Kristjáni. Hún var nefnilega eini gesturinn á Vísindaveislunni sem leysti svonefnda gátu Einsteins! Kristján tók þá gátu með sér heim og ætlar að hafa samband við Vísindavefinn þegar lausnin er fundin. Unnur leysti einnig skákrautina léttilega og hið sama má segja um teninginn. Vísindavefurinn óskar Unni Ósk innilega til hamingju.

Að lokum er rétt hrósa Valgerði Sigurðardóttur sérstaklega. Hún var aldursforseti þeirra sem spreyttu sig á þrautunum. Þrátt fyrir að vera komin af léttasta skeiði gerði hún sér lítið fyrir og raðaði teningnum saman af mikilli fimi.

Hér fylgir nafnalisti þeirra sem leystu þrautir vísindaveislunnar.

Hver á fiskinn?

• Unnur Ósk Unnsteinsdóttir

Skákþraut

• Kristján Guðjónsson
• Gunnar Björn Tryggvason
• Höskuldur Haraldsson
• Unnur Ósk Unnsteinsdóttir
• Þorgrímur Kjartansson

Teningur

• Sólrún Dögg Baldursdóttir
• Bjarney Guðrún Jónsdóttir
• Kristján Guðjónsson
• Sölvi Kristinn Jónsson
• Teitur Helgason, Stefán Grímur Rafnsson og Hinrik Ingólfsson í sameiningu
• María Björt Guðnadóttir
• Svava Birna Stefánsdóttir
• Guðrún Anna Guðnadóttir
• Signý Björk Kristjánsdóttir, Emilía Brá Höskuldsdóttir og Inga S. Eggertsdóttir í sameiningu
• Ragnheiður Rúnarsdóttir
• Silvia Windmann
• Ísabella Eir Thorbergsdóttir
• Maríanna Freysdóttir
• Sigurásta Guðbjörg Ólafsdóttir
• Valgerður Sigurðardóttir
• Unnur Ósk Unnsteinsdóttir

Myndir:

Vísindaveisla á Vopnafirði | Facebook. (Sótt 19.05.2015).
...