Sendu inn spurningu

Hér getur þú sent okkur nýjar spurningar um vísindaleg efni.

Hafðu spurninguna stutta og hnitmiðaða og sendu aðeins eina í einu. Einlægar og vandaðar spurningar um mikilvæg efni eru líklegastar til að kalla fram vönduð og greið svör. Ekki er víst að tími vinnist til að svara öllum spurningum.

Persónulegar upplýsingar um spyrjendur eru eingöngu notaðar í starfsemi vefsins, til dæmis til að svör verði við hæfi spyrjenda. Spurningum er ekki sinnt ef spyrjandi villir á sér heimildir eða segir ekki nægileg deili á sér.

Spurningum sem eru ekki á verksviði vefsins er eytt.

Að öðru leyti er hægt að spyrja Vísindavefinn um allt milli himins og jarðar!

=

Jöklar og ís í Melaskóla

Ótal spurningar um jökla og loftslagsmál brunnu á nemendum í sjöunda árgangi Melaskóla sem fengu í morgun heimsókn frá Helga Björnssyni, prófessor emeritus í jöklafræði við Háskóla Íslands, í tilefni af degi íslenskrar náttúru. Helgi var að senda frá sér barnabók um þessi efni sem unnin er í samstarfi við Vísindavef Háskóla Íslands.

Helgi Björnsson, prófessor emeritus í jöklafræði, svaraði spurningum barna í Melaskóla á degi íslenskrar náttúru.

Helgi er heimsþekktur vísindamaður á sviði jöklafræði og hefur í áratugi rannsakað jökla og áhrif loftslagsbreytinga á þá. Ritverk Helga eru um 260 á löngum og farsælum vísindamannsferli, flest þeirra ætluð sérfræðingum og birt í ritrýndum fræðiritum. Í dag, á degi íslenskrar náttúru, kom hins vegar út bókin Af hverju eru jöklar og ís á jörðinni: Spurningar af Vísindavefnum um jökla og loftslagsmál sem Helgi hefur skrifað sérstaklega handa börnum og fróðleiksfúsum almenningi. Þetta er önnur bókin á vegum Vísindavefs Háskóla Íslands þar sem vísindum og fræðum er miðlað til ungra barna en útgefandi hennar er Mál og menning.

Ótal spurningar brunnu á nemendum í sjöunda árgangi Melaskóla.

Í bókinni er að finna 45 spurningar og svör um jökla og loftslagsmál, meðal annars svör við spurningunum: Hvernig verða jöklar til? Eru jöklar á öðrum hnöttum? Dó allt líf út á Íslandi þegar jökull lá yfir landinu? Hvers vegna hlýnar nú á jörðinni? og Hvað gæti mannkynið gert til þess að draga úr hlýnun jarðar? Öllum spurningum fylgja skemmtilegar og skýrandi myndir eftir Þórarinn Má Baldursson.

Hátt í hundrað börn úr fjórum sjöundu bekkjum í Melaskóla komu saman í hátíðasal skólans í dag í tilefni af degi íslenskrar náttúru og þar gafst þeim kostur á að fræðast um og spyrja Helga spjörunum úr um jökla, ís og loftslagsmál. Áður en að því kom afhenti Jón Gunnar Þorsteinsson, ritstjóri Vísindavefsins, Sigrúnu Magnúsdóttur, umhverfis- og auðlindaráðherra, eintak af nýju bókinni og þá fékk Melaskóli einnig fjögur eintök til eignar.

Jón Gunnar Þorsteinsson, ritstjóri Vísindavefsins afhenti bæði Sigrúnu Magnúsdóttur, umhverfis- og auðlindaráðherra, og Maríu Sophusdóttur, kennara við Melaskóla, eintök af nýju bókinni.

Meðal spurninga sem brunnu á börnunum var hversu mikið heimshöfin mundu hækka ef allir jöklar heimsins bráðna, hvers vegna jöklar skríða fram á við og hvers vegna jöklar á Íslandi bráðnuðu svo hratt sem raun ber vitni. Svörin hafði Helgi á reiðum höndum en þau er einnig að finna í barnabókinni sem kom út í dag.


Myndir: Kristinn Ingólfsson tók ljósmyndirnar sem fylgja þessari frétt.

Útgáfudagur

16.9.2015

Spyrjandi

Ritstjórn

Efnisorð

Höfundur

Tilvísun

Ritstjórn Vísindavefsins. „Jöklar og ís í Melaskóla.“ Vísindavefurinn, 16. september 2015. Sótt 23. janúar 2018. http://visindavefur.is/svar.php?id=70958.

Ritstjórn Vísindavefsins. (2015, 16. september). Jöklar og ís í Melaskóla. Vísindavefurinn. Sótt af http://visindavefur.is/svar.php?id=70958

Ritstjórn Vísindavefsins. „Jöklar og ís í Melaskóla.“ Vísindavefurinn. 16. sep. 2015. Vefsíða. 23. jan. 2018. <http://visindavefur.is/svar.php?id=70958>.

Chicago | APA | MLA

Sendu inn spurningu
eða

Vísindadagatalið

Disklingar

Disklingar geyma rafræn gögn. Þeir tilheyra svokölluðu ytra minni tölvu en það geymir allt sem á að varðveita eftir að slökkt hefur verið á tölvunni. Segulsvið og járnseglandi efni er notað til að skrá upplýsingar á disklinga. Fyrstu disklingarnir komu á markað 1971 en nú hafa aðrar leiðir til varðveislu rafrænna gagna tekið við hlutverki disklinga.