Er grátrana algengur fugl í Álftaveri eða þar nálægt?

Nafn þitt

Netfang þitt

Netfang móttakanda

Ruslpóstvörn =

Svar

Er grátrana algengur fugl í Álftaveri eða þar nálægt?
Í heild hljóðaði spurningin svona:

Tel mig hafa séð grátrönu frekar en gráhegra í Álftaveri í dag 20.8.'23. Náði ekki nothæfum myndum. Fuglinn virtist einn á ferð. Er trana algeng á þessum slóðum?

Grátrana (Grus grus) er flækingur á Íslandi og ekki algengur fugl en hefur þó sést á ýmsum stöðum. Varpheimkynni hennar eru í norðanverðri Evrópu og Norður-Asíu (utan túndrusvæðanna). Stór hluti tegundarinnar verpir í Rússlandi en einnig verpir hún í Skandinavíu og víðar, til dæmis er lítill varpstofn á Englandi og Skotlandi.

Staðfest er að grátrönur hafi á undanförnum árum verpt hér á Austurlandi og komið þar upp ungum. Haustið 2019 sást til fjögurra fullorðinna fugla sem væntanlega voru að undirbúa flug til vetrarstöðva sem líklegast eru á Spáni eða norðurhluta Afríku. Nokkrum árum áður sást til unga á Héraði og haustið 2018 náðst mynd af grátrönupari með tvo unga þannig að hugsanlega gæti þessi glæsilegi fugl fest rætur hér.

Það er ekki hægt að útiloka að fyrirspyrjandi hafi séð grátrönu í Álftaveri því grátrönur hafa áður sést á þeim slóðum þótt ekki hafi verið tilkynnt um þær á svæðinu síðastliðin ár. Hins vegar hafa gráhegrar verið algengir flækingar í Vestur-Skaftafellssýslu og sjást stundum við vötn og læki. Það er því ekki ólíklegt að um hafi verið að ræða gráhegra frekar en grátrönu þar sem þeir eru einnig óvenju háfættir fugla.

Heimildir og mynd:

• Náttúrustofa Austurlands. (2019, 18. september). Grátrönur á Héraðssandi. (Sótt 21.12.2023).
• Náttúrustofa Austurlands. (2018, 4. október). Grátrönur koma upp ungum. (Sótt 21.12.2023).
• Grus grus - Common Crane 04.jpg - Wikimedia Commons. Höfundur myndar Zeynel Cebeci. Birt undir Creative Commons CC BY-SA 4.0 DEED. (Sótt 21.12.2023).

...