Sólin
Rís 05:40 • sest 21:16
Tunglið
Rís 15:13 • Sest 05:59
Flóð
Árdegis: 03:57 • Síðdegis: 16:31
Fjara
Árdegis: 10:23 • Síðdegis: 22:34
Hár vaxa upp frá hársrótum og í þeim eru frumur sem framleiða litarefni sem kallast melanin (pheomelanin í rauðhærðu fólki). Þegar fólk tekur að eldast byrja þessar frumur að hrörna og við það minnkar framleiðsla þeirra á áðurnefndu litarefni. Almennt má gera ráð fyrir að þessi hrörnun byrji í kringum 30 ára aldur hjá körlum en 35 ára aldur hjá konum. Þessar tölur eru þó mjög breytilegar frá einum einstaklingi til annars. Athyglisvert er að fólk hefur tilhneigingu til að fá grá hár fyrr nú á dögum en áður. Þótt orsakir þess séu ekki þekktar til hlítar er talið líklegt að breytingar á mataræði og lífsstíl, svo og aukin umhverfismengun, hafi þar sitt að segja.
Til viðbótar við þessa eðlilegu hrörnun má nefna aðrar orsakir sem geta komið í veg fyrir framleiðslu melanins, svo sem áverka og meðfædda sjúkdóma. Meðal sjúkdóma sem hafa áhrif af þessu tagi er að minnsta kosti einn erfðasjúkdómur sem kallast Waardenburg-heilkenni (Waardenburg syndrome) og hefur fólk með þann sjúkdóm oft gráan eða hvítan lokk í hári auk annarra einkenna. Þá benda nýlegar rannsóknir á músum til þess að gallar í genum, sem hafa fyrst og fremst með starfsemi ónæmiskerfisins að gera, geti gert það að verkum að hár gráni hraðar en ella. Hvort þetta hefur þýðingu fyrir mannfólkið er þó of snemmt að segja til um.
Sjá einnig svar Pálma V. Jónssonar við Af hverju eldumst við?
Mynd: HB