Hvað eru margar stjörnuþokur í alheiminum?

Svar

Stjörnuþoka er annað orð yfir vetrarbraut (e. galaxy) og hugtakið vísar til þyrpingu stjarna, geimefna og ýmissa loftegunda. Stjörnuþokurnar eru gífurlega stórar. Í einni stjörnuþoku er talið að séu um 100-400 milljarðar stjarna, stundum miklu fleiri. En í einum milljarði eru þúsund milljónir!

Í dag telja menn að í alheiminum séu um 100-400 milljarðar vetrarbrauta sem er í raun sama tala og fjöldi stjarna í hverri vetrarbraut.

Stjörnuþokan NGC 300.
Við bestu aðstæður er hægt að greina um 6000 stjörnur með berum augum frá jörðinni á allri himinhvelfingunni. Helmingur hvelfingarinnar er hins vegar fyrir neðan sjóndeildarhring hverju sinni og þess vegna er bara hægt að sjá um 3000 stjörnur með berum augum án þess að fara í langt ferðalag.

Frekara lesefni á Vísindvaefnum:

• Hvernig vita menn að það eru til aðrar vetrarbrautir? Eða að það séu til milljónir af þeim?
• Hvað eru margar stjörnur í geimnum?
• Getur þú sagt mér allt um stjörnuþokur?
• Hver er munurinn á stjörnuþoku og vetrarbraut?
• Hvað heitir stjörnuþokan sem er næst okkur?

Mynd:

• NASA: Jet Propulsion Laboratory. Sótt 5.2.2009.